" ضرب الحبيب زي أكل الزبيب "
" سيبيه يتفشش فيا … انا عارفة انه بيعمل كده من حبه ليا "
" بدور لجوزي على عروسة "
—————
بصي حبيبتي لو حد فهمك ان اللي بتعمليه ده محبة أو طبيعي فإنتي عيانة
جوزك راجل ناضج مستقل
المفروض يعني
فلعبك لدور الأم … و يا ريت أم محترمة أو مربية لأ ده انتي أم مهزأة ملوش غير دلالات كلها أوحش من بعضها
فحاولي للحظة تتواصلي مع إنسانيتك و تدركي ان لا ده دورك ولا ربنا كرمك و حافظ عليكي و رزقك عشان تهيني انتي نفسك و تسمي الإهانة مسميات زي حب و إهتمام و أكل زبيب و العك ده
و يا ربت مثلاً الحجات دي بتزود من أنوثتك أو بتزيد من إحترام اللي قدامك ليكي و تقديره
بالعكس
دي بتوضح أد ايه انتي مش حاسة بنفسك و فاسدة و جواكي خربان
= كل ده عشان عايزة أجوزه ؟
- يا بابا انتي تعوزي وللا متعوزيش بتاع ايه ؟ هو انتي معتبرة نفسك انتي و هو واحد ليه أصلاً ؟!!!
= مش انتي مبتعترضيش ع الجواز التاني و السيدة سارة هي اللي قالت لسيدنا إبراهيم يتجوز السيدة هاجر .. فيها ايه يعني ؟
- ده كان لغرض ان الرسالة متنتهيش بإنتهاء ذرية إبراهيم … انما انتي جوزك ايه رسالته في الحياة عشان تدوريله على عروسة معلش ؟ و هل انتي مبتخلفيش وللا ده زيادة خير يعني وللا ايه ؟
إحفظي حدودك و احترمي نفسك سيكا و حسي بقيمتك … مفيهاش حاجة.