الغربة لعب عيال !!

ولَّا الغبي مُختال !!

أنا ضَي عابر للبحور

فكَّرت دي سفيتني

أنا نبتَة ماتت بِـ بور

فكرتها أرضي ..

أنا خطوة قابلت سور

ظنِّيته لمدينتي

أنا كلمة ساندة ع السطور

وحسبتها روايتي

،

جسدي في يوم لو مال

واتحط ع الِّاكتاف

وصبحت أنا موال

يتحاكوا بيه بِـ هتاف

الروح أمانة عندكوا

ما هي عندكوا من يوم ما غبت

من يوم مطار القاهرة

من يومها هي قاهرة

من يومي خدت غياب

وحضوري كان باهت

وأفيش لفيلم العيد

بطله بدور صامت

ينطق كلام بالعين

يحذفله ألف ديوان

يطرد بنات فِكرُه

يِمحِي أثر نبضه

ويداري نفسه فِـ ليل

لحافه .. دمعاته

الدنيا رعد وبرق

يتخبَّى فـ سكاته

بطل قتيل البطل

،

مالكم حزانا ليه؟!

يامّه جرالك إيه !!

مش كنتي دايما تدعي

الحصوة حتى تحبِّني

آدِي الدعا وآدي النصيب

والحصوة حالفة تضمني

،