حاولت اكتب عن الفرحه

و جنه بالخَضار طارحه

و ورده شوكها ما بيجرحش

.........

حاولت ولسه اهو بعافر

وفرحى من زمان سافر 

ياريت يرجع و ميأخرش

...........

سنين عمرى إللى عماله

بتسرقنى ب١٠٠ حاله

بتجرحنى ومتأثرش

..........

قالولى أوصف جمال الورد 

من غير شوك

و جَمِّل ناس بقلبك صُنتهم

و باعوك

و زيح الهم عن روحك 

وما تفكرش

..............

انا يا خلق مش قادر 

أكون غيرى

طريق الآهه مقسوم لى

بإيد طيرى

و كأس الحب متسمم

ولا بيسكِرش

...........

رجعت أكتب عن الدمعه 

و ع الأحزان

ياريت بين الأمل واليأس

القى ميزان

عشان لما اجى ابيع روحى

انا ما اخسرش