بابا هتوحشنى
انت عارف بقالك يومين مشيت وسيبتنا هنا
حاسة يابابا انك واحشنى .. نفسى اكون فى حضنك
نفسى ترجع تذاكرلى تانى
واحشنى زعيقك وعصبيتك عليا لما اغلط
واحشنى الشيكولاتة اللى كنت بتجبهالى
واحشنى ضحكتك الجميلة لما اعمل موقف يضحك
واحشنى كوباية اللبن من ايديك الحلوة في الصبحية
وانا رايحة المدرسة
واحشنى برنامج كلمتين وبس وانا بسمعه معاك
واحشنى اقعد معاك وتحفظنى قل هو الله أحد
واحشنى
.. ماما قالت لى انك روحت عند ربنا ..
قولى يابابا هترجع امتى؟؟ !!

***




بابا فات تالت يوم على سفرك عند ربنا
ولسه مرجعتش انت وحشتني
متعودتش تبعد عني كل ده
أنت وحش ومش هحبك
لأ لأ أنت حلو وبحبك
بس نفسي أنام جنبك وتحكي لي
حدوتة عن الأميرة سارة
وعقد اللولي
ماما بتحكي لي بس مش بتعرف
متقولهاش يابابا لما ترجع عشان متزعلش
عارف يابابا ماما وكل الناس
قالوا ان عند ربنا حاجات كتير حلوة
هات لي حاجات حلوة من دي وأنت راجع
وحشتيني ياأحلى أب في الدنيا

******
عارف يابابا النهاردة كان فرح طنط
جارتنا وباباها هو اللي وصلها لعمو العريس
هو أنت هتتأخر يابابا في سفرك عند ربنا لحد ما اكبر
واتجوز ؟؟
طيب مين هيوصلني لعريسي ؟؟
ومين هيمسك ايد العريس وعمو المأذون بيجوزنا؟؟
ومين هيعيط لما أركب العربية مع عريسي وامشي ؟؟
لأ ياسي بابا هو أنت ناوي بجد تتأخر في سفرك عند ربنا
لحد ما أكبر .. أرجع بسرعة بقى وحشتني
وكمان عايزة اتجوز زي طنط جارتنا
وأخلف اطفال كتير شبهك !!!
يتبع,,,