٨ سنين فاتت يا عبير ياااه ده عمر زى اللى عشته معاكى .٨سنين مضت منذ أن غادرتى الحياه أو غادرتنى الحياه! .٨سنين ونصف همه اللى عشتهم معاكى ومعشتش غيرهم فات زيهم وكأنه امبارح!..السنه اللى فاتت كانت صعبه على اظن انك عارفه كنت هحصلك! كان الأمر وشيكا ..كنت خايف قوى عالعيال بعد ما أصبح لى وجود معاهم وحسوا بي.. كنت شايل هم مصطفى قوى غلبان مصطفى والدنيا شديدة عليه !. والبنات.. ياسمينا كبرت غامضة بس عاقله و فاهمه و إدراكها اكبر من سنها..اما ساره القلب الكبير ابتسامتك وملامحك كل ماشوفها كأنى شايفك تزداد شبها بك يوما بعد يوم فلما أراها كانى أراكى وكل اللى يشوفها وكان يعرفك مبيقولش غير " اللى خلف مامتش! " صحيح اللى خلف ما متش.. ومين قال إن انتى موتى. انتى معانا وانتى عارفه فعليا وليس مجازا ولو كنتى موتى فانتى مسبتيناش . مين اللى قال الميت بيسيب الحى !..لا الميت بيسيب الحى ولا الحى بيسيب الميت.. مهو الرابط اللى بينا منتهاش بل علاقه كانت.. وأصبحت.. وستظل !..وأيا ما كان سيكون غدا!.ماحنا لازم نسند بعض! انتى تعلمين وانا اعلم والله يعلم..أنا دعيت ربنا كتير ليكى وبيكى طلبت ان تكونى وسيلتى واظنه استجاب .. ساندتينى كتير فدنياكى وبعدها ساعدتينى وحاولتى وعملتى اللى عليكى جزاك الله عنى وعن ولادنا خيرا..كنتى الراحه والسكينه والانس والسكن ونعم الزوجة والرفيقه..انتى عارفه لما بشوفك بحس أنه حقيقي وبجد بحس بحضورك الطاغى ولما بصحى بقول يا خساره ده كان حلم.!..كان حلم !..وايه الفرق بين الحلم والحقيقة!.. الحياة كلها مجرد حلم.. وبكره نصحى منه.. انتى صحيتى منه وعرفتى حقيقته وانا لسه حلمى مستمر منتهاش!..ربنا رحمك.. ربنا يرحمك و يعفو عنك و يزيدك من فضله و عطفه ولطفه وكرمه..اللهم اجزها عنا خيرا واجزها عن الاحسان إحسانا وعن الاساءه عفوا وغفرانا اللهم اغسلها بالماء والثلج والبرد ونقها من الخطايا كما ينقى الثوب الأبيض من الدنس اللهم عاملها بما أنت أهله.. اللهم يا رب ريحها زى مكانت مريحانى..كانت مريحانى عبير !..الله يرحمك..ويرحمنى ..ولا حول ولا قوه الا بالله العلي العظيم.