سكك حديد مصر....لكل مصر

شارك فى تطوير سكك حديد مصر علشان هى لكل مصر

هذا هو شعار الحملة الجديدة و الجميلة التابعة لوزارة النقل من اجل تطوير سكك الحديد...

سكك حديد مصر اللى بتنقل أكتر من 1.4 مليون راكب يوميا ( 30% من اجمالي حجم المسافرين علي مستوى مصر )
سكك حديد مصر هى ثانى سكك حديد على مستوى العالم بعد أنجلترا ، أنشأت عام 1854 فى عهد الخديوى اسماعيل باشا ،.
سكك حديد مصر اللى بقالها أكتر من سنتين وسيلة هروبى الوحيدة من و الى القاهرة (هروب علشان القاهرة يوم الخميس عاملة زى فيلم الهروب الكبير...الشاطر يخرج)

سكك حديد مصر اللى بقالها كتير شغلى الشاغل... و بأبحث دائما فى أى حل او فعل إيجابى أقدر أعمله تجاه هذا الصرح اللى لا يمكن ان يُهمل أو يتدهور حالة...

و الحمد لله أن وزارة النقل شخصيا أخدت بالها و عملت الخطوة الأولى...

و دعونى أتكلم أولا عن الحملة ، ثم أعرض نظرنى الشخصية فى سكك حديد مصر و فى حملة وزارة النقل...

الحملة عبارة عن مراحل، أول مرحلة و التى جارى تنفيذها حاليا، و الدعاية لها فى الراديو و التليفزيون...

رابط الإعلان المعروض حاليا
http://www.youtube.com/watch?v=-T2mwRrcWcU

عبارة عن توعية مستخدمى القطارات ، عن طريق أستندات فى محطات القطار الرئيسية مثل محطة
مصر، الأسكندرية ، طنطا... بها موظفين تابعين لوزارة النقل ، يقدمون ورق به معلومات عن الهيئة و تعليمات لمرتادى القطار بكيفية الحفاظ على عربات القطار و الممارسات الخاطئة التى يجب وقفها ، او توعية من نراهم يمارسوها....و هى كما فى الصورة...



إتلاف الشبابيك و المقاعد.
القاء الفضالات فى غير الأماكن المخصصة لها.
التهرب من دفع التذكرة.
تعطيل إنطلاق القطار لاى سبب.
فك اى جزء من القطار.

(هنا توقفت لمدة يومين.... و عاودت الأن الكتابة بحماس ،بعد أن أنعشتنى للكتابة أعصابى (اللى ما عدتش بتتحرق بسهولة زى الأول)......عندما تأخر قطر المنصورة بتاع الساعة 5 لمدة نصف ساعة ما بيجيش على الرصيف)

:)

المهم نرجع تانى للحملة...

الحملة و التى تهدف توعية مستخدمى القطار ، من وجهه نظرى خطوة أولى إيجابية جدا...و خلوا بالكو من كلمة أولى دى.

ذهبت مرة من مرات ذهابى لمحطة القطر الى أستاند الحملة الواقع فى طرف الصالة الضخمة ، فوجدت صندوق شفاف به أوراق صغيرة و شابان (من موظفى وزارة النقل) أستقبلونى بحماس ، فأعطونى ورقة و شرحوا لى أنها معلومات عن سكك حديد مصر...يليها فى أخر الورقة سؤال إجابته من المعلومات العلوية....و يوجد جائزة للفائز....كان أول سؤالى لهم.... كيف أساعدكم ؟؟ عايزة أشترك معاكم... عندى ملاحظات و شكاوى كتيرة....

أبتسموا و قالولى ...المرحلة دى مش مرحلة الشكاوى...المرحلة دى علشان توعية الناس للحفاظ على السكه و بس...الشكاوى المرحلة التانية... مش معقول نخلى الناس تشتكى من غير ما تبقى على الأقل عارفة أى حاجة عن السكة الحديد...أو على الأقل عارفة واجبتها .

قلتلهم...يعنى إتجاه واحد !!...مع إن فيه مشاكل كتيرة سببها مش فى الناس......سببها الهيئة نفسها.... و الحقيقة أنا ما صدقت الاقى حد أتكلم معاه فى المشاكل...لا يوجد صندوق شكاوى واحد فى محطة مصر.... و فى المحطات الصغيرة...مايعرفوش يعنى ايه أصلا صندوق شكاوى ...لما سألتهم هناك مرة عن صندوق الشكاوى.....قالولى ممكن تلاقى فى محطة مصر...(و كأنى بأسئل على أيس كريم بالكوسة :) ....

ضحكوا و قالولى .. أحنا هنا من وزراة النقل ، مش من هيئة السكة الحديد ... و الحملة دى من وزارة النقل.... مش من هيئة السكة الحديد..... فيه ناس كتيرة بتجيلنا برضه علشان الشكاوى...محامين و دكاتره جامعة...كل اللى نقدر نعمله أن أحنا نوصلهم لمكتب رئيس الهيئة...مكتبه فوق...

قلتلهم...طب نصبر على المرحلة التانية....ممكن أساعدكم إزاى فى المرحلة الأولى :) أنا مستعدة أنا و أصدقائى ، نعمل إستند زى دة فى المحطات الصغيرة لتوعية الناس هناك كمان...أو أخد شوية ورق من دة أوزعه على الناس لتوعيتهم...

ضحكوا و قالولى...دى عهدة ما ينفعش نديهالك...لازم تتحط فى الصندوق اللى هنا...و الأستاندات فى المحطات الرئيسية فقط، اللى أغلب الناس بتعدى عليها..

:) ضحكت أن كمان و قلتلهم...دا انا عايزة أساعد الحملة...طب قولولى...هل يوجد إقبال على الحملة؟...يعنى كام واحد شارك فى المسابقة لغاية دلوقتى؟؟...ردهم جاء بحماس.... "كتيييير...فى أقل من أسبوع أكتر من 8000 مشارك"..... (هنا كانت المفاجأه المفجعة و بسرعة سألتهم).....أنتوا عارفين كام واحد بيستعمل القطار يوميا و بيعدى على محطة مصر!!؟؟؟ ....لو كنتوا مركزين فى المعلومات اللى فوق هتعرفوا تجاوبوا على هذا السؤال :)

جاء ردهم على سؤالى صادم على اى الأحوال....... من وجهه نظرهم 8000 مشارك فى الأسبوع رقم كبير، فى حين ان اكتر من مليون راكب بيعدى عليهم يوميا...

انتهى الحوار الشيق معهم باننا كلنا منتظرة المرحلة التانية بفارغ الصبر :) .... و خرجت من محطة مصر بحماسة أقل مما دخلت بها.... و لكنى خرجت و فى مخى الف و الف تساؤل.........انا ما صدقت يبقى فيه أصلا حد مهتم......ايه اللى ناقص؟؟؟

أخذت أفكر فى التنظيم الهائل و التخطيط وراء هذه الحملة "الجديدة و المختلفة نوعيا".... أكيد فيها تنظيم ، و أهداف و رؤية و خطوات مدروسة....أخذت افكر فى "يا سلام لو فيه إهتمام أكتر بيها من جانب الناس... لأ ....... من جانب هيئة السكة الحديد نفسها......... يعنى تتوزع منشورات التوعية مجانا لكل المسافرين فى المحطة مش بس فى الإستاند اللى فى طرف المحطة...واللى لا يمكن أن تأخذ منه اكثر من ورقة واحدة بس......... يكون فيه حمالات إعلانية فى التليفزيون ......... حملات على صفحات الأنترنت....وسيلة سهلة و سريعة ، و غير مكلفة ( انا دورت كتير على أى معلومة عن الحملة على الأنترنت ما لقيتش ولا كلمة...)

الحقيقة انا مستغربة دة مش بيحصل ليه؟؟؟

حولت تفكيرى على نفسى ، مش كل حاجة على الحكومة ، انا كمان عليا دور...... لازم ما أسكتش لما أشوف حد بيعمل حاجة غلط فى القطر.......انا بطبيعتى ما بأسكتش........بس هأعمل أيه مثلا لما ألاقى الطرقة بتاعت القطر"المكيف" مليانه ناس واقفة...مش دافعة تذاكر...هأقول لمين و لا لمين؟؟ ... و هأقول أيه أنا و بافى الركاب ساكت..... و هأقول ايه انا و أساسا الكمسرى ماعداش عليهم أصلا....؟؟؟؟ هاقولهم أطلعوا دوروا على الكمسرى و أدفعوله التذكرةّ!!؟؟ :)

أخدنى التفكير ان المشاكل تانية كتير...من وجهه نظرى حلها مش من الناس....حلها من الهيئة نفسها.... مشاكل غريبة .... و مضحكة فى نفس الوقت... :)

مثلا: كل ساعات محطة المنصورة معطلة..... و مكتوب عليها ورقة "معطلة"

مثلا : كل الحديد اللى بالعرض فى مكان وضع الشنط فوق الكراسى فى عربات القطار ، مش موجود....


و لما أخذتنى الشجاعة و سالت واحد من مسئولى القطار... قالى.... بنصلحة......قلتله ما هو حديد وسليم و بيستحمل...تصلح فيه أيه؟؟؟ قالى.... هنعمله بمسامير علشان الشنط تمسك فيه ما تقعش....!!! :)

الحقيقة فيه مشاكل كتير.....بس وجود الحملة دى أعطتنى امل فى التغيير....أعطتنى أمل ان فيه حد واخد باله و عايز يعمل حاجة.....لكن من وجهه نظرى الحملة مش واخده حقها من الدعاية.......يعنى كام واحد من مستخدمى القطر عرف بالحملة و اهدافها.....المرحلة الأولى من الحملة من وزارة النقل (متمثلة فى إستندات الحملة) الى الركاب... فين دور هيئة السكة الحديد و فين دورنا احنا كركاب ؟؟؟؟
انا مع الحملة جدا و أريد دعمها بكل طريقة....و السؤال : هنعمل ايه ؟؟؟ إزاى نشجع الحملة ؟؟؟
منتظرة أرائكم و أقتراحاتكم بفارغ الصبر...

تحياتى
:)


الموقع الرسمى لهيئة سكك حديد مصر
http://www.egyptrail.gov.eg/adocs/index.html
خطوط السكك الحديدية في العالم.. نشأتها وتطورها
http://result.al-jazirah.com.sa/maga...06/therd12.htm