منيش تمثال بمنافلة
تشد الخيط وتملاني
ولما تشوف لعب أحلى
تسيب الخيط عشان أبعد وتنساني
منيش لعبة بخصل من صوف
تعقد فيها و تضفر
ولو تزهق تقولي ظروف
أعيش ع الرف واتعفر
منيش تلاجة تحفظلك
مشاعرك لما تركنها
ولو تفتح تنورلك
تصونك وأنت ما تصونها
منيش منكسرة وضعيفة
ولا على دنيتي ضيفة
أنا كبيرة ... وبتكبر على حزني
أنا أميرة ... سفينتي في بحري بتاخدني
أبحّر وقت ما يحلا الهوا الصيفي
واعمل م الربيع ضيفي
وبعمل م العواصف جيش
يوجه قوّته سيفي
وبضحك للرياح تتلم
منيش شايلة الليالي هم
عملت الضي م النجمة
يغطي بنوره أكبر ضي
عملت من القمر كلمة
تونسني في عمري الجاي
سكون الوحدة جربته
وروضته ودربته
بقيت الصحبة وقريبته
بقيت متصاحبة على نفسي
وبعمل كل ما في نفسي
ولسة ببص في مرايتي
وأشوفك خارج الصورة
وكنت ولسة قادرة أكون
ومهما على القُريِّب أهون
مباتش في لحظة مكسورة