كل الأيام فيها خير حتي لو مش شايفينه، بس هو يومي النهاردة كان تقيل وفيه خير أكيد .. حرارة ٣٩ من بليل، وحاجات مهمة المفروض تتعمل، بتتعمل عادي، بفتكر جملة أمي زمان كانت بتقولها لنا وماكنتش باخد بالي منها ،"باخد تعبي على رجليا" واحنا بنعديها، المهم الحرارة نزلت الحمد لله واخدت أدوية دور البرد أتمني ما ترجعش بليل تاني، وكملت اليوم في انتظار درس لبنتي وبعدين هداني عقلي اقعد في البلكونة أنتظر
هنا بس اليوم بدأ عارف لما يقع في قلبك إحساس انت عيشته من سنين وقت كنت صغير وقت لحظة أمان، اقرب لليلة صيف النهار فيها بيروح وانت بتلعب مع صحابك في الشارع وشامم ريحة الهوا الدافي والشبابيك حواليك بتنور نور أصفر وصوت التيلفزيون يبقي أوضح، والله سامعة مزيكا فيلم لعادل امام ???? .. وانت طالع بيتكم عشان تعبت من اللعب تغسل ايدك ووشك وتكمل اليوم قدام التلفزيون .. بالظبط كدة كان الوقت وغياب النهار بالنسبة لي
يزيد عليه صوت القطط في السطوح اللي قدامي وست كبيرة عايشة فوق سطح عمارة بتطلع تخوفهم وزمزأة بنتي من المذاكرة اللي أنا سمعاها برة
اليوم خُلص بصوت عم حزومبل بس احنا كبرنا اكتر من اللازم ????