"غلبني الشوق،
وغلبني"

صوت الاغنيه كان جاي من عند الجيران، دايماً بيشغلوا الاغاني اللي بتوصف حالي، كأنهم عارفين اللي بمر بيه وإني بعاني في بُعدك
سرحت مع الأغنية وانا بفتكر اول مرة شوفتك فيها
بنوتة جميله بملامح رقيقة وبشرة بيضا، دخلتِ قاعة الامتحان وانتِ بترفعي نضارتك بتوتر وبتعتذرى علي التأخير
كان مكانِك جنبي، قعدتِ جنبي وبدأتِ تقرأى ورقة الامتحان بتوتر، وبعدين بدأتِ تحلى، وبعد نص ساعه كنتِ خلصتِ، وكنت انا لسة مخلصتش، كنت مش عارف أحل، ماانا مكنتش في شطارتك يا ستي، بصتيلي بجنب عينك وانتِ بتقولي:
• النقطه الأولى فى السؤال الأول هتبقي (b)
بدأت اكتب اللى انتِ بتقوليه، وفجأه الدكتور اخد باله وعملنا محضر غش وطردنا من القاعه، وشيلتِ الماده بسببي، كنت متضايق عشانك وشايل ذنبك عشان انتِ متستاهليش كدا ابداً

رفعت نضارتها بعصبيه وهي بتقول:
انت غبي! عمالة اقولك اكتب إجابة السؤال التالت وانت مبتقولش حاجه غير ايه! ايه! هو ايه اللي ايه!!
• ماانا مكنتش سامعك والله
• يعني ايه مكنتش سامعني! يعني انا ذنبي ايه أشيل الماده عشان انت ودانك بايظه
• انا اسف
• اعمل ايه ب اسف دي يعني! اسف دي هتلغي محضر الغش ولا هتنجحني!

كنت في موقف لا يُحسد عليه، مكنتش عارف ارد اقول ايه وقتها

بصتيلي لآخر مرة بعصبيه قبل ما تاخدي شنطتك وتمشي
ومن يومها مخرجتيش من بالي لحظة، مش عارف ليه، حاسس اني مشدود ليكِ بطريقة غريبة، مش عارف ليه ولا عارف ايه اللي شدني ليكِ بالشكل دا
سألت عليكِ لحد ما عرفت أوصلك، والحقيقة مدورتش كتير لأنى لقيت ناس كتير في الكلية عرفاكِ، طلعت مش بس ملامحك اللي حلوة، دا طلعت كمان روحك جميلة وكل الناس بتحبك، وإسمك كمان جميل اوي، نادرة
عرفت كمان اوصل ل رقمك، حبيت ابدأ بالواتساب الأول، و بعت مسدج:
• نادرة
• مين؟
فرحت انك رديتِ، وكتبت بسرعة:
• مش عرفاني؟!
• الصوره مش ظاهره
استغربت لما قولتِ ان الصورة مش ظاهره مع اني مخليها ظاهره لكل الناس!
• انا حمزه
• حمزه مين!
• اللي كنتِ معاكِ في الامتحان، واتعملنا محضر غِش
• بسببك
ضحكت وانا بقول:
• ماشي يا ستي، لازم تفكريني يعني!
• انت كنت نسيت اصلا! دا انت يومك اسود معايا
• يومي اسود! صلي علي النبي بس واهدي كدا انا اصلا كلمتك عشان اعتذرلك عن اللي حصل بسببي
و منستش اهو
• شاطر
ولا يهمك ياعم خلاص دا نصيب
• طب حيث كدا بقي عايز اطلب منك طلب، ممكن؟!
• اكيد، اتفضل..
• هو مش طلب بصراحه هو مساعده، عايزك تساعديني فى مذاكره الماده دي عشان مش عارف اذاكرها خالص، ينفع؟!
• ينفع..
ابتسمت بسعاده وانا بقول:
• تحبي نبدأ من امتا؟!
• بعد ما نخلص امتحانات بأسبوع
• الشهر الجاي؟
• ايوا
• اتفقنا

عدي شهر واحنا كل يوم بنتكلم، اتعرفنا علي بعض اكتر، بقيت عارف كل تفاصيل يومك، وانتِ كمان، حكيتلك عن أحلامي وطموحاتي، وحكتيلي عن كل حاجه وحشه حصلتلك، و حكتيلي كمان عن الحاجات اللى بتحبيها، كان بينا حاجات كتير مشتركه، و كان بينا توافق فكرى كبير، كنا متفاهمين، وبقيتِ جزء اساسي من يومي

لحد ما جه اليوم اللي هنتقابل فيه، كنت مستنيه بقالي كتير، حسيت الشهر دا كان سنة، نزلت قعدت في الكافيه قبل معادنا بنص ساعه، بس كالعاده اتأخرتِ برضو، استنيت ساعه كاملة وكنت مستعد استني اكتر بس المهم في الاخر تيجي واشوفك
فضلت باصص علي باب الكافية لحد ما وصلتِ كنتِ لابسة فستان لونه ابيض مشجر وطرحه لونها نبيتي، تابعتك بعيني وانا مُبتسم لحد ما وصلتِ عندي، حركتي الكرسي وقعدتِ وانتِ بتقولي:
• اسفة جدا علي التأخير بجد اسفه
ابتسمت وانا بقول:
• ولا يهمك خالص، المهم انك جيتِ

قضينا يوم جميل سوا، عكس ما كنت مُتخيل، كنت مُتخيل انه هيكون وقت عادي زي اى وقت، بس طلع اجمل مما كنت أتوقع بكتير، يمكن علشان كدا عدي بسرعه، مش عارف، بس اللي اعرفه اني مبسوط

عدت شهور، قربنا من بعض اوي وبقينا أصحاب، كل يوم بنتكلم، كل يوم بتشاركيني تفاصيل حياتي، بقيت بحب الحاجات اللي بتحبيها، بحب الاغاني والاماكن،والشوارع
علشانك..

صحيت من نومي علي رسالة منك بتقوليلي فيها انك عايزه تشوفيني، الغريب اني كنت لسة هكلمك واقولك انك وحشاني ولازم اشوفك
والغريب اكتر اني صحيت مبسوط، كل يوم بصحي من نومي مزاجي مش احسن حاجه، بس دي اول مره اقوم مبسوط، متوقعتش اني ممكن في يوم اصحي مبسوط بسبب شخص، بس انتِ قدرتى تعملي دا، قعدت افكر ازاي شخص واحد قادر يحببنا في حاجات كتير مكناش بنحبها، ازاى رسالة من شخص قادره تخلينا مبسوطين ويومنا جميل، ازاي شخص واحد قادر يخلي لحياتنا معني بعد ما كنا شايفنها بلا فائده، ازاي شخص قِدر يرجع شغفنا اللي كان اتطفي ويصحي كل حاجه حلوة كانت ماتت جوانا، ازاي قِدر يخليها جميله بالشكل دا !
معقول يكون الحب!!

وقفت قدام دولابي محتار البس ايه، كنت عايز شكلي يبقي حلو قدامك، لبست قميص لونه زيتي وبنطلون لونه بيج، ونزلت قعدت عند النيل زي ما طلبتِ، عدي وقت قليل وكنتِ موجودة، كان وشك حزين وباهت، لكن رغم حزنه جميل كالعاده..

• إزيك يا نادرة!
• بخير
وانت؟
• الحمدلله
مالك؟!
ابتسمتِ_باين عليا اوي كدا
• باين للي يعرفك كويس
احكيلي بقي
• بص يا حمزه
• معاكِ
• انا مقتنعه إقتناع تام بإن كل شخص له قدرات و ان كلنا مش عندنا نفس مستوي الذكاء، وبرضو مقتنعه ان انا قدراتي قليلة ومش هبقي اشطر حد في مجالى وراضيه ب دا جداً ومش زعلانه، بس.. بس أهلى كل ما يشوفوا اني لسه متعلمتش حاجه في مجالى يقولو امُال احنا بنعلمك ليه! وكل دا علي الفاضي وانتِ مش بتفهمي حاجه، مش مقتنعين اني لسه في اول طريقي يعني لسه بتعلم، لا هما دايماً شايفين اني فاشلة، واني شخصية وحشة اوي، لحد ما بدأت اقتنع بكدا، كلامهم بيوجعني اوي يا حمزه، هو انا استاهل اتشاف كدا يعني!!
فضلت باصص لك كتير وانا مستغرب ازاي ممكن تتشافي فاشلة او وحشة، دا انا من وقت ما عرفتك مشوفتش اجمل ولا اشطر منك في الدنيا، بيتهيألي عمرى ما شوفت حد في شطارتك، ولا جمالك

• ايه، روحت فين!
فوقت من سرحاني علي صوتك، و سكت للحظات قبل ما اقول:
• نادره، انتِ احسن واجمل واحده قابلتها في حياتي، حقيقي والله انا عمرى ما شوفتك فاشله، بالعكس انا دايماً بشوفك شاطره جدا وهتبقي اشطر حد في مجالك عالفكره، وبرضو عمرى ما شوفتك وحشه، انتِ عمرك ما كنتِ ولا هتكوني وحشه، ياستي تعالي خدي عيوني وشوفي نفسك بيها، شوفي انتِ قد ايه جميله

وقتها بصيتِ في الأرض بكسوف، غيرت الموضوع وانا بقول:
• صحيح يا نادرة
انتِ رسمك جميل اوي، ليه مفكرتيش تعملى مشروع ل نفسك
• ازاي؟!
• يعني مثلاً ليه مفكرتيش تفتحي ورشة ل تعليم الرسم، او مثلاً ترسمي لوحات كتير وتفتحي مكان تعرضي لوحاتك فيه وتتباع، فكره حلوة جداً عالفكره، وانتِ هتنجحي في دا جداً عالفكره، الإنسان بيطلع احسن ما عنده فى الحاجه اللي بيحبها، وانتِ بتحبي الرسم واكيد هتطلعي حاجات هتبهر كل الناس
• بجد! انت شايف اني هنجح في المشروع دا
• هتنجحي جداً، ولو وقفت قدامك حاجه انا معاكِ كدا كدا يا ستي متقلقيش
ابتسمتِ_ حاسه اني اتحمست للموضوع اوي وعايزه ابدأ فيه دلوقتي
• خلاص يبقي تبدأى
• بس خايفه
• متخافيش انتِ قد اي حاجه انا واثق فيكِ جداً
• بجد؟!
• بجد
• اول ما اوصل البيت هقعد افكر في موضوع الورشة، اتفقنا؟
• اتفقنا

بدأتِ تفكرى في فكره ورشة تعليم الرسم، وبعد فتره بدأتِ تنفذى اللي خططتي له، او بدأنا ننفذ، ما احنا كنا واحد ومع بعض في كل خطوة، ماهو مكانش ينفع مبقاش مصدر دعم ليكِ يا ستي
كانت بتقابلنا عقبات كتير اوي، بس رغم كدا و رغم أنها كانت رحلة صعبه اوي، الا انها كانت جميله عشان معاكِ

كانت نقطه تحول في حياتي لما بدأتي تتحولي من البنت اللي كانت بالنسبه لي عادية، للبنت اللي وجودها بيحلي مرارة الايام، علطول بسأل نفسي سؤال..
ازاي ملامح الشخص اللي بنحبه بتتغير في عنينا لمجرد اننا حبناه! ازاي بنشوفه حلو اوي كدا وكأنه أخد جمال العالم كله له لوحده!
دا انا لما بشوف صوره ليكِ اول ما اصحي بحس انى ماليش نِفس اشوف حد غيرك، ما هو مفيش حلوين بعدك

قررت اعترف لك بحبي، اياً كان رد فعلك هيكون ايه بس مش قادر أخبي مشاعرى اكتر من كدا، مع اني كل مره بشوفك ببقي شايف في عيونك شغف انك عايزه تسمعيها مني، بس برضو خايف، خايف ترفضي و وقتها هخسرك، وانا مقدرش اتخيل فكره عدم وجودك
صحيت بدرى عشان الحق اختار هلبس ايه، وقفت ساعه ونص قدام الدولاب بختار البس ايه يعجبك، فضلت اجرب حاجات كتير لحد ما عرفت هلبس ايه، لبست بنطلون لونه ابيض وقميص لونه نبيتي، عارفك بتحبي اللون النبيتي اوي، و لبست الساعه والكوتشي اللي بتحبيهم، و جبتلك ورد لونه احمر زي ما بتحبيه، و جهزت قاعده حلوة في المكان اللي بتحبيه، عند النيل ، كان لازم كل حاجه تكون مظبوطه

وصلت قبلك كالعاده، وبعد ساعه انتِ وصلتِ، و قعدتِ تتكلمي كتير زي عادتك وانا بسمعك، بسمعك بس مش عارف اركز في اي حاجه غير في ازاي هقولك، اجبها ازاي، انا اول مره احب واول مره اتحط في الموقف دا، لحد ما قررت اقولك
بصيت لك بكل حب وسعاده الدنيا دي ومحستش بنفسي غير وانا بميل علي راسك ابوسها وانا باقول:
• انا بحبك
فضلت باصص لِك وانا براقب رد فِعلك و ملامح وشك، كان باين عليكِ التوتر ونفسِك كان سريع، ابتسامتي بدأت تختفي لما عدي وقت من غير ما تتكلمي
كنت مكسوف وشكلي كان وحش اوي

• نادره، انا اسف لو ضايقتك انا عارف اني كنت بايخ اوي، وكنت خايف اقولك تكسفيني ويبقي شكلي وحش زي دلوقتي كدا بس انا مقدرتش أخبي مشاعرى اكتر من كدا و...
• انا كمان بحبك
• ايه! قولتِ ايه؟!
ابتسمتِ بكسوف وانتِ بتقولي:
• بقولك انا كمان بحبك اوي يا حمزه
وقتها ابتسمت ابتسامه سعيده وحسيت اني خلاص مش محتاج اي حاجه تاني من الدنيا غيرك، كنت مبسوط اوي ب حُبك، كنت مبسوط لأنك بتحبيني زي ما بحبك

"أمانه عليك يا ليل طوِل وهات العمر مـ الأول
بحب جديد و قلبي سعيد، يا ريتني عشقت عمنول
أمانه أمانه .. أمانه امانه.. أمانة يا ليلي
يا ليل"

الاغنيه اشتغلت في الشارع فجأه
بصيت لك وانا مُبتسم و مسكت ايديكِ، وانا بقول:
• خلفية رايقه ومظبوطه بالمللى
ابتسمتِ وانتِ بتبصي علي النيل بكسوف وانتِ بتقولي:
• مظبوطه جداً

كان لازم اشوف شغل كويس عشان اعرف اتقدملك، كنت باخد كورسات و دورات كتير عشان الوقت دا، و قدمت علي شغل في شركات كتير، وعملت انترفيو في ٥ شركات، وللأسف متقبلتش، و كمان رايح انترفيو النهارده، كنت خايف متقبلش برضو، لكن كنت بتطمن بوجودِك
بعد شوية وصلنا عند الشركه وكان باقي نص ساعه علي الانترفيو، بس فجأه قومت مشيت، جريتِ ورايا وانتِ بتقولي:
• حمزه، استني يا حمزه
حمزه، انت رايح فين!
• مش هروح المقابلة، خلاص مش عايز اشتغل في شركات
• تعالي بس اسمعني
خدت في وشي ومشيت بدون ما اديكِ فرصه، مشيت علي الكورنيش وانا بفك الجرافته بإهمال وباصص علي النيل بضيق
• وبعدين!
• عايزه ايه!
• هتستلم؟
• ايوا
• هتتخلى عن حلمك عشان شوية عقبات قابلوك!
• ايوا
• معني كلامك انك بتتخلى عني
• انا تعبت
• مفيش انسان حقق احلامه بسهوله، مفيش حد وصل للي هو عايزه بسهولة، لازم نتعب عشان نوصل، يا اما مش هنعرف نوصل
كملت وانا نبره صوتي كلها كسره نفس وحزن:
• انا حاولت كتير، وموصلتش
خلاص انا مش قادر احاول تاني، معنديش طاقه لمحاولات تاني و لا اني اترفض تاني، دا سادس انترفيو يا نادره، انتِ فاهمه، انا لو متقبلتش في دا كمان نفسيتي هتدمر، انا مش قادر ادخل وفي الاخر متقبلش
• مين قال انك مش هتتقبل!
• ماهو كالعاده، ايه الجديد يعني!
• هتستسلم يعني! طب والدورات والكورسات اللي انت اخدتها، والسهر والتعب اللي تعبته عشان توصل ل هنا، كل دا هيترمي علي الارض كدا !
• هو اترمي خلاص كدا كدا
• طب وانا ! مفكرتش فيا، هتوصلي ازاي!
• انا مش قادر احاول تاني
• وانا مستاهلش انك تحاول مره واتنين ومية!!
• مقصدش كدا، بس هستفاد ايه من محاوله كدا كدا هتفشل
• وليه واثق انها هتفشل! ما يمكن تنجح المره دي، ولو المره دي كمان فشلت تجرب تاني
• قصدك سابع
• ومية ومتين، هو انا مستاهلش المحاولات دي كلها !
فكر في حلمك اللي نفسك توصل له وسهرت عشانه كتير، فكر فيا، هتضيع كل دا في لحظه؟!
• انا خايف أفشل
• الخوف احساس طبيعي، طبيعي تخاف علي حلمك، بس المفروض خوفك دا يخليك تسعي اكتر، مش تضيعه من إيديك، وحتي لو فشلت هتبقي في نظر نفسك حاولت، مش من بداية الطريق اليأس غلبك وضيعت حلمك، وضيعتني من إيديك عشان شوية خوف
سكت للحظات وانا بفكر في كلامك، وبعدين قومت مشيت وانا باقول:
• انا مش هكمل
مشيتِ ورايا بسرعه وانتِ بتقولي:
• مش هتكمل ايه؟!
• مش هكمل محاولات
وقفت فجأه وانا ببص لك وبكمل كلامي:
ومش هكمل معاكِ
دموعك نزلت، خوفت أضعف قدامك وسبتك ومشيت، سبتك وانا مقرر اني مش هعلقك اكتر علي الفاضي، مينفعش تكملي مع واحد مالوش مستقبل

فاتت سنه، بعد ما كنت مقرر اني مش هحاول تاني، حاولت عشرة، علشانِك، روحت المكان اللي كنا بنقعد فيه دايماً، افتكرت ذكرياتنا وايامنا الجميله سوا، وافتكرت كمان انتِ قد ايه حاولتِ تخليني احاول تاني و حاولتِ تخلينا نكمل سوا، بس انا اللي صممت نبعد، افتكرت وانتِ بتقوليلي:
"انت إنسان ضعيف وعمرك ما هتتقدم خطوة ل قدام وهتفضل فاشل طول عمرك، انت تستاهل انك تخسرني فعلاً، تستاهل تتعذب ب حُبي طول عمرك عشان محاولتش عشاني مره، يمكن لو كنت حبتني بجد كنت هتحاول عشاني مليون مره، مش مره ولا اتنين ولا حتى عشرة"
كان عندِك حق، انا فعلاً إنسان فاشل وضعيف، واستاهل اتعذب ب حُبك، الحاجه الوحيده اللي كنتِ غلطانه فيها هو إحساسِك بإني محبتكيش، دا انا محبتش قدك في حياتي، دا من وقت ما دخلتِ قلبي قفلت عليكِ وقولت محدش هيسكنه غيرك، حاولت كتير اخليكِ ترجعيلي لكن كلها محاولات فاضية، انا عارف اني خذلتك، يمكن أسوأ شعور في الدنيا هو الخذلان، تبقي موجه كل طاقتك في اتجاه واحد وتلاقي القلم جاي فجأه من نفس الباب اللي سندت عليه بضهرك، بيجيلك من نفس الباب اللى بتديله كل ثقتك، نفسي اجيلك واقولك اني اسف، اسف علي كل حاجه، اسف انى ضيعتك من ايدى

ام كلثوم نهت الاغنيه وهى بتقول:
"وليل البعد دوبني، دوبني، دوبني
ومهما البعد حيرني
ومهما السهد سهرني
لا طول بعدك يغيرني
ولا الأيام بتبعدني بعيد، بعيد، عنك"

ولا الايام بتبعدنى بعيد عنِك، ولا هتبعدنى، قررت احاول تانى معاكِ، وبعد محاولات كتير اخيراً وافقتِ تقابلينى، مهتمتش البس ايه زي كل مره، يمكن دي اول مره مهتمش بنفسي وانا جاي اشوفك، وصلت المكان بتاعنا قبلك كالعاده، استنيتك ساعتين، وكنت مستعد استني اكتر المهم في الاخر تيجي
وصلتِ بعد اربع ساعات، اول ما شوفتك بصيت لك بعيون كلها شوق، كنتِ وحشاني بشكل ميتوصفش، كنت نفسي اخدك في حضني من كتر ما انتِ وحشاني، مديت لكِ ايدى وانا بسلم عليكِ قبل ما اقول:
• إزيك يا نادره؟
• بخير يا حمزه، طلبت تقابلنى ليه؟
• انا في السنه دى فكرت كتير وحاولت تاني عشانِك، عشان اعرفك اوصلك، وقدمت في شركات كتير واتقبلت في احسن شركه فيهم، عارف اني غلطت لما بعدتك عني، كنت غبي لما ضعيتك من ايدي، كنت غبي لما خسِرتك
• عايز ايه يا حمزه، دلوقتي انت بقيت عندك شغلك وحياتك اتظبطت ومبسوط، ناقصك ايه؟
• ناقصني وجودِك، وجودِك اللي كان علطول معايا في كل حاجه، في كلام كتير عايز اقوله ليكِ، في حاجات كتير نقصاكِ، يمكن اه حياتي اتظبطت، لكن مش مبسوط، فرحتي ناقصه بعدم وجودك
• المفروض انا اعمل ايه دلوقتي؟! انت نسيت انا حاولت معاك كام مرة! نسيت دموعى اللى نزلت بسببك! نسيت لما كنت بقولك متمشيش انت لو مشيت هتعب وبرضو مهمكش ومشيت!
وبعد كل دا عايزنا نرجع! للاسف يا حمزه انا مش قادره اسامحك ولا قادره أنسالك اي حاجه
• نادره انا بحبك
• انت محبتش غير نفسك
• لا يا نادره حبيتك، ولما فقدت الأمل في اني الاقي شغل واحقق اللي بتمناه سيبتك عشان ملكيش ذنب تتبهدلي معايا، ولما حياتي اتظبطت رجعتلك، ورجوعي اكبر دليل على انى لسة بحبك
• هأمنلك ازاى تانى! ماانت ممكن فى اى وقت لو وقعت تانى تبعد عنى، مع ان المفروض لما تقع متقعش لوحدك، المفروض اكون جنبك، لكن انت بعدتنى عنك، انت كسرتني يا حمزه
• مش هبعد تانى، ومش هعمل حاجه تضايقك تانى
• وانا ايه يثبتلى ان كلامك دا حقيقي
• معنديش إثبات بكلام، الايام هتثبتلك لو وافقتِ تديني فرصة تانية، و انا اوعدك انى عمرى ما هسيبك ولا هكسرك ولا هسبب لِك اى وجع
بصيت فى عيونك وانا بكمل بصدق:
• أوعدك يا نادره
• وايه يثبتلي انك لسه بتحبني؟!
• مفيش حاجه ليها معنى من غيرك

بصيتِ لى بتردد، وسكتِ للحظات قبل ما تقولى:
• ماشي، انا موافقة اديك فرصه تانيه
بصيت لِك بفرحه وانا بضحك بسعادة من كل قلبي، ومحستش بنفسي غير وانا واخدك فى حضنى، حضن يعوض قلبي عن غيابك طول الفترة دى
• وحشتيني اوي
• عمرك ما غِبت

بعد فترة مش طويله اتخطبنا، كنت بجيلك زيارة كل اسبوع اقعد معاكِ شوية ومكنتش بلحق اشبع منك، كنت دايماً بحلم باليوم اللى هيجى ونروح بيتنا سوا ونبقي جايين سوا ومسبكيش وامشي، مهما كنت أحاول اتخيل اللحظه دى تفكيري ميجبنيش أعيش تفاصيلها فى خيالى من كُتر ما انا شايفها حِلم بعيد، بعيد أوى..

بس النهارده بقينا بنروح البيت دا سوا وننزل سوا نروح بيتنا، عارف لما تكون بتحلم حلم جميل وفجأه تفوق تلاقى نفسك عايشه، بقيت اخرج والف كتير وفى الاخر ارجع ل حضنِك
الحضن هو الحاجه الوحيده اللي بتخفف وجعنا، هو الأمان والبيت الدافي اللي نلف مهما نلف وفى الاخر بنرجع له، بنرجع ل حضن حنين نرمى فيه وجعنا وخوفنا عشان نقدر نتطمن، هو اللغه الوحيده اللى كل الناس بتفهمها

• حمزه! انا عايزه اعترفلك بإعتراف
• ممم، عملتِ مصيبة ايه تاني؟!
• لا مش مصيبه ولا حاجه انت عارف انا مش بتاعت الكلام دا
• طبعاً يا حبيبتي طبعاً، اتفضلي اعترفي
• فاكر لما كلمتني اول مره علي الواتساب وقولتلك ان صورتك مش ظاهره
• ممم
ضحكتِ وانتِ بتقولي:
• بصراحه وقتها كانت ظاهره، بس كنت عايزه ابان تقيله
ضحكت وانا بقول:
• انا كنت عارف عالفكره
طب اعترفلك انا كمان بإعتراف
• ممم
• لما شيلتِ الماده بسببي كنت زعلان وشايل ذنبك اوي، بس علي قد ما كنت زعلان وقتها ومكنتش طايق المراقب دا، علي قد ما انا دلوقتي نفسي ابوس المراقب دا واشكره عشان هو اللي جمعني بيكِ
ابتسمتِ في نفس اللحظه اللي حطيتِ راسك علي صدرى فيها قبل ما تقولي:
• مبسوط معايا يا حمزه؟!
اخدتك في حضني في نفس اللحظه اللي قولت فيها:
• وهو اللي يلاقي نفسه جنب حبيبته هيحتاج ايه تاني من الدنيا؟!♥️

أنا هويــــت وانتهيــــت