• هتفضلي تحبيه من بعيد كدا!
• لا هروح اعترف له بحبي
• مبهزرش
• ضحكت_اقولك ايه طيب
ياابنتي سليم دا ميعرفش اني عايشه اساساً
• ما هو مش معقول برضو تحبي واحد عشان بسيط!
وبتروحي الحفلات اللي بيعملها كل فتره دي
• انا مش بحبه لانه بسيط
• امُال بتحبيه ليه ياست سعاد حسني!
• معرفش
• متعرفيش ازاي
• سبت فرشة الألوان من ايدي_هقولك
الحب مالوش سبب ، انا مثلاً لو حبيتك عشان شكلك حلو ، هل الشكل الحلو دا هيدوم؟!
الإجابة: لا ، ومجرد ما الشكل الحلو دا يروح انا هبطل احبك
يعني باختصار الحب مينفعش يكون له سبب لأنه هيروح مع زوال السبب دا
• بقيتِ بتقولي حِكم من ساعت ما حبتيه
• دي مش حِكم ، دي حقيقه
• اممم
• ايه هو اللي اممم دا
• امشي اطلعي برا بقي عشان برسم ومش فاضيه لكِ
• طب هتروحي حفلة يوم الجمعه؟
• اه اكيد
وانتِ هتيجي معايا صح؟!
• لا
• لا ليه بس يا سمسمتي يا قمراية انتِ
• مش هاجي لا
• عشان خاطرى تعالي انا اتعودت اروح معاكِ علطول وبعدين انتِ عارفه اني لسة طفلة ومش بعرف اروح مكان من غيرك
عشان خاطرى وافقي
• وبعدين؟
• وبعدين ايه؟
• هتفضلي تحبيه من بعيد كدا وتعذبي نفسك علي الفاضي
• كفاية اني بشوفه
كفاية انه كل يوم بينزل صورة علي ايميله وبشوفه ، كفاية انه كل فتره بيعمل حفلة وبشوفه
حتي لو بشوفه من بعيد انا راضية
سليم شخص بسيط اوي ، هو شاعر وبدأ يِتعرف من فتره قليلة ، هو كل فتره بيعمل حفله في النيل للناس اللي بتحب الشِعر ، بيحب يتعرف علي الناس ويكلمهم
عدت الايام وجه يوم الجمعه ، يوم الحفله ، اليوم اللي كنت مستنياه من كتير اوي ، اليوم اللي هشوفه فيه
من كام يوم سليم نزل بوست علي الفيس بوك قال فيه انه هيكون مبسوط لو حد رسمه ، وقررت اني ارسمه ، ورسمته فعلاً ، مع انى متوتره جداً وخايفة متعجبوش ، بس قررت اني هقدمها له كهدية وربنا يستر
حقيقي فرحتي النهارده متتوصفش
• يلا يا سمسمتي بقي اتأخرنا ، المركب هتتحرك ٦ ونص
• حاضر يا جميله خلاص خلصت و ...
بصت ليا بااستغراب قبل ما تقول: ايه دا!
• ايه في ايه!
• شكلك حلو اوي ، بقي كل الشياكه دي عشان استاذ سليم بتاعك!
• اتسكفت_انا حبيت ابقي حلوة النهارده
نزلنا بسرعه عشان نلحق ، كنت خايفه اوي منلحقش والحفله تفوتنا ، بس لحقته وشوفته اخيراً ، كنت مستنيه يوم الجمعه دا من زمان اوي ، كنت حاسه الايام بتعدي ببطئ عشان انا مستنياه
اخيراً شوفته
كان واقف عند المركب وبيشاور للناس عشان تطلع بسرعه عشان نتحرك
شكله جميل اوي النهارده ، كل مره بشوفه بيبقي احلى من المره اللي قبلها ، يمكن هو اكتر شخص بشوفه حلو ، رغم انه دايماً يقول ان جماله بسيط بس انا عمرى ما شوفت جماله بسيط ، بالعكس انا بشوفه اجمل واحد في الدنيا
سرحت فيه وفي ملامحه اللي محبتش قدها وبساطته اللي خطفتني من اول يوم شوفته فيه
فوقت علي ضربة في دراعي من أسماء وهي بتقول:
• بصي قدامك هتفضحينا
• ضحكت_معلش سرحت شوية
• لا مش وقته تسرحي خالص ، كدا هنتفضح
• ضحكت_حاضر خلاص مش هسرح
• طب ايه ، مش هتقومي تديله البورتريه اللي رسمتيه!
• في آخر الحفله
• ماشي
"طول عمري بقول
لا انا قد الشوق وليالي الشوق
لا انا قد الشوق وليالي الشوق
ولا قلبي قد عذابه ، عذابه"
كالعاده بيبدأ حفلته بأغنيه للست ، كأن ام كلثوم بتقصدني بكلامها
اعيط طيب دلوقتي ولا اعمل ايه!
عدي ساعتين كانت الاغنيه خلصت وهو بدأ يقول شِعر من اشعاره اللي مسمعتش اجمل منها
وللأسف الحفله خلصت
• استاذ سليم
• ابتسم وهو بيقول: ايوا
• انا جبت لحضرتك حاجه
• حاجه ايه؟
• البورتريه دا
علامات الصدمه والفرحه بانوا علي وشه في نفس الوقت وضحك
وبعدين بقي في ضحكته اللي تخطف القلب دي ، اقوله بحبك دلوقتي دا طيب ولا اعمل ايه!
• انتِ ازاي افتكرتي!
اتوترت وانا بقول:
حضرتك قولت انك هتفرح لو حد رسمك وانا عندي موهبة الرسم وبحبها ، وبحب اجي الحفلات اللي حضرتك بتعملها ، فقولت ليه مرسمكش!
ابتسم والفرحة باينه في عيونه وقال:
شكراً بجد شكراً ، هي حلوة اوي ، انا فعلاً فرحت اوي
• ابتسمت_شكراً علي ايه بس! انا حقيقي مبسوطه انه عجب حضرتك
• شكراً بجد يا أستاذة...
• جميله ، أسمى جميله
• ابتسم_حقيقي اتشرفت بمعرفتك
• شكراً ، وانا كمان بجد
• ممكن طلب؟
• اه اتفضل طبعاً
• ممكن ايميل الفيسبوك؟
• نعم!!
• مش قصدي حاجه والله ، اقصد بس عشان هنزل الصورة علي البروفايل عندي وحابب اعملك منشن
• اه تمام
• انا هبعت لحضرتك ادد
• ابتسم_وانا هقبله
• شكراً
حضرتك محتاج مني حاجه قبل ما امشي؟
• انتِ مش محتاجه حاجه؟
• شكراً لحضرتك جداً
انا همشي بقي عشان اختي مستنياني هناك
• اه طبعا اتفضلي
مع السلامه
• مع السلامه
سبته ومشيت وانا مُبتسمه وفرحتي بااني شوفته واتكلمت معاه باينه علي وشي ، كنت خايفه اوي يكون لاحظ ، ماهي عيون العاشقين بتبان والعيون بتلمع لما نشوف اللي بنحبهم ولغة العيون مستحيل تكذب
• مبسوطه كدا ليه! قالك بحبك؟!
ضحكت بفرحة_لا يا ظريفة
• اُمال في ايه!
• البورتريه عجبه اوي يا أسماء وكان مبسوط بيه اوي
• لا دا انتِ تحكيلي اللي حصل بقي
• بصي يا ستي ، انا قولتله اني رسمته وهو اول ما شاف البورتريه كان مبسوط اوي بيه ومبسوط اكتر ان في حد اهتم و رسمه زي ما طلب في البوست واستغرب اني اهتميت وافتكرت
بصت ليا بحماس وهي بتقول: وايه كمان؟
• وقالي شكراً
• بس!
• اه
• وانا اللي فكرته عنده دم وقالك انه بيحبك
• ياابنتي هو يعرفني!
دا لسة اول مره يشوفني النهارده
بس تعرفي ، انا مبسوطه اوي ان البورتريه عجبه ، كنت خايفه اوي ميعجبوش ، ومبسوطه اني شوفته بعد غياب طويل اوي ، ومبسوطه اكتر انه اتكلم معايا عادي كدا
تعرفي كمان ، ضحكته من قريب حلوة اوي
ملامحه وضحكته اللي في الصوره حلوة طبعاً ، ومن بعيد برضو حلوين ، بس من قريب احلى بكتير اوي
• يا سيدي يا سيدي ، دا انتِ وقفتي وركزتي بقي
• اتكسفت_اه ركزت ، مكانش ينفع اضيع فرصة زي دي من غير ما اركز في ملامحه وتفاصيله الجميله دي
بس خايفه اوي يكون لاحظ حاجه
• ما هي بصراحه لمعه عينك دي اكيد فضحتك
• بجد! هو انا باين عليا اوي!
• مالك اتخضيتِ كدا ليه ، بهزر معاكِ ياابنتي
• خوفت يكون باين عليا
• لا ان شاء الله يكون ملاحظش حاجه
• يارب ان شاء الله
بعد ساعتين سليم نزل الصوره علي الفيسبوك وكتب:
من كام يتم نزلت بوست كاتب فيه اني هكون مبسوط اوي لو حد رسمني ، مكنتش متوقع ان حد يهتم عشان وقتها كنت منزله زي فضفضه عادية ، بس في بنت اهتمت ورسمتني وحقيقي انا مُمتن ليها جداً ومبسوط جداً
شكراً يا جميله
ازاي شخص ممكن يفرح شخص تاني بمجرد ضحكه ، او كلمه ، او نظره ، او حتي بوست
ازاي وجود شخص في الحياه قادر يخلي لحياتنا معنى ، ازاي ضحكته بس تقدر تخلينا مبسوطين!
كتبت اخر كلمتين في مذكراتي بس ما كتبت كل اللي حصل في يومي النهارده وكل احساس حلو حسيته وقد ايه كنت مبسوطه ، زي ما اتعودت اكتب كل حاجه
صحيت تاني يوم علي مسدج منه ، ايوا من سليم
• إزيك يا استاذه جميله ، انا اسف لو بزعجك ، بس في موضوع مُهم حابب اكلمك فيه ، لما تبقي فاضيه كلميني ، وياريت لو نتقابل هيكون احسن ، هستني منك رد..
قلقت وفي نفس الوقت مكنتش عارفه ارد اقول ايه:
حسيت انها فرصه اشوفه ونتكلم تاني سوا ، بس لا لازم ابقي تقيلة
رديت من غير ما افكر:
انا فاضيه ، هو في حاجه؟
عدت دقيقه ورد:
ينفع نتقابل؟!
• اه ينفع ، امتا وفين؟
• في كافيه ام كلثوم اللي عند الكورنيش الساعه ٥ تمام؟
• اه تمام
• هستناكِ
• حاضر
كنت متوتره اوي ، متوقعتش انه يحصل بينا كلام تاني ، في دماغي مليون سؤال ، هو عايز يقابلني ليه وياترى هيكلمني في ايه؟ في نفس الوقت خايفه
وقفت ساعه ونص قدام الدولاب عشان اختار فستان شكله حلو ، لبست كل الفساتين اللي عندي تقريباً ، كنت محتاره اوي البس ايه ، وفي الاخر اختارت فستاني الأبيض ، اكتر فستان بحبه واكتر فستان بيحليني ، ولبست طرحتي النبيتي وحطيت ميك اب خفيف
نزلت الساعه ٤ عشان اوصل في نفس المعاد ، وفعلاً وصلت ٥ بالظبط
• انا اسفه لو اتأخرت
• ابتسم_لا خالص ، انتِ مواعيدك مظبوطه جداً
عامله ايه؟
• الحمد لله ، حضرتك اخبارك ايه؟
• الحمد لله بخير
بصي مبدأياً كدا عايزين نشيل الالقاب اللي بينا دي ، يعني بلاش حضرتك ويا استاذ ، قوليلي يا سليم بس
• ابتسمت_حاضر ، وانت كمان قولي يا جميله بس
• ضحك ضحكته الجميله اللي قادره توديني بلاد وتجيبني وقال:
حاضر
انا طلبت اقابلك النهارده عشان موضوع كدا
• موضوع ايه؟!
• بصي يا ستي ، لما نزلت البورتريه اللي رسمتيه عندي علي الايميل ، عجب ناس كتير اوي
في راجل انا اعرفه اسمه استاذ عيسي هو بيحب الرسم اوي والفترة دي هيفتح الجاليري بتاعه ، هو عايزك تشاركيه في الجاليري
• ازاي؟
• هترسمي لوحات وبعد ما تخلصيها هتكون موجوده في الجاليري بس المهم تخلصيها قبل الافتتاح
• لا لا يا سليم دا موضوع كبير اوي عليا ومش هنجح فيه
• ليه بتقولي كدا ، عالفكره انتِ رسمك حلو جداً ، ومش بقول كدا عشان انتِ رسمتيني وكدا ، لا خالص انا بقول كدا عشان فعلاً شايفك بترسمي حلو جداً وفرصة زي دي ليكِ كويسه جداً وانا واثق انك هتنجحي
• شكراً بجد علي كلامك الحلو دا ، بس لا خايفه ، انا أخرى ارسم في البيت كدا مع نفسي ، لكن جاليري وكل الناس تشوف ومش عارفه هيعجبهم ولا لا ، مش عارفه هنجح ولا هفشل
• هتنجحي ، انا واثق من دا ، وياستي حتي لو فشلتِ ، فيها ايه يعني علي الاقل هتكوني حاولتِ
• بس هبقي شكلي وحش اوي لو فشلت ، غير اني هكسفك قدام صاحبك
• ياابنتي شكلك وحش ايه وتكسفيني ايه بس!
بصي يا جميله خليكِ عارفه ان الحياه تجارب ، احنا مش عايشين عشان ننجح ونبهر الناس بينا بس ، لا اكيد هيجي علينا وقت هنفشل فيه ونقع بس الأكيد اننا هنقوم تاني وهننجح
• يعني تفتكر اني هنجح!
• و واثق من كدا جداً كمان
سكتت للحظات قبل ما اقول:
خلاص انا موافقة
ابتسم قبل ما يقول: تمام وانا هحدد معاد معاه ونقابله سوا وتتفقوا علي كل حاجه
• خلاص تمام
شكراً بجد
• علي ايه بس
بقولك ، ينفع اخد رقم موبايلك عشان لما استاذ عيسي يحدد المقابله ، عشان بس مش بفتح الماسنجر كتير وساعات مش باخد بالي من الرسايل
• اه اكيد مفيش مشكله
• تمام
• انا هستأذن بقي عشان اتأخرت
• اه اكيد طبعاً اتفضلي ، اول ما يكلمني هكلمك علطول اقولك علي المعاد
• خلاص تمام وانا هستني مكالمتك
• تمام
محتاجه مني حاجه؟
• شكراً ربنا يكرمك ، مع السلامه
• مع السلامه
مش هنكر انه لما طلب يقابلني رسمت في دماغى الف سيناريو وتخيلت حاجات مستحيل تحصل ، بس اليوم كان لطيف اوي وانا كنت مبسوطه ، مكنتش اتخيل ان يحصل بينا كل المواقف دي وتجمعنا كل الصُدف دي ، بس زي ما بيقولوا اللقا نصيب...
عدى يومين وسليم كلمني عشان استاذ عيسى صاحب الجاليري عايز يقابلني
اتقابلنا واتفقنا وبدأت ارسم اللوحات وسليم وقف جنبي وكان دايماً بيدعمني ولو في حاجه محتاجه تعديل بيلفت نظرى ليها بلطافة
كان كل ما الوقت يعدى حبى ليه بيزيد ، حسيت انى تعبت بس مش في ايدى حاجه اعملها ، سليم بقي اهم شخص فى حياتى ، لو متضايقه هو أول واحد بيكون جنبي ولو مبسوطه برضو هو أول واحد بيكون جنبي ، اكتر واحد بيسمعني من غير ملل مهما الكلام طال ، كل حاجه معاه بقت حلوة
فوقت من سرحانى على صوت مسدج ، كانت منه:
• بقولك!
• ايوا
• تعالي ننزل نقعد في اي مكان شوية
• فين؟
• اللي انتِ عايزاه
• تعالي نقعد عند النيل
• ماشي هستناكِ
• ماشي
لبست فستاني الاسود وطرحه لونها بيج وحطيت ميك اب خفيف اوي ونزلت..
شوفته قاعد علي كرسي وبيشاور ليا من بعيد ، كان لابس تيشرت لونه اسود بارز عضلاته وبنطلون اسود ، كان شكله حلو اوى كالعاده
• اتأخرت عليك؟
• لا خالص انا لسة جاى دلوقتي
• ابتسمت_اخبارك ايه؟
• الحمد لله
انتِ طمنيني عليكِ
• الحمد لله
ايه بقي ، طلبت اننا نتقابل ليه؟ في حاجه ولا ايه؟!
• هو لازم عشان نتقابل يبقي في حاجه!
• مش بالظبط بس استغربت يعني
• ابتسم_مفيش ياستي انا حسيت بملل شوية فقولت اكلمك ننزل نقعد شوية
• سليم ، شوف احنا أصحاب بقالنا قد ايه ومحكتليش موضوع الفيلا بالتفصيل
• ضحك_مجتش فرصه مناسبه اني اقولك
• طب اهي جت ، قولي بقي
• دي حكاية طويله اوي
• انا حابة اسمع
• دي ياستي فيلا لعلاج الإدمان ، حبيت اساعد الشباب المُدمنين ومش عارفين يبطلوا ، اشتغلت كتير اوي وعافرت لحد ما اشتريت الفيلا دي وبدأت اجهزها من كل حاجه عشان تبقي مناسبه للعلاج وجبت دكاتره طبعاً عشان يعالجوهم
في شباب كتير كويسين جداً بس بيجي عليهم وقت وبييأسوا بسبب ضغوطات كتير جداً ، في منهم منهم مهندسين وشباب زي الفل بس بيتسحبوا للطريق دا عشان يتغلبوا علي وجع قلبهم ، دا بيكون اعتقادهم بس ميعرفوش ان كدا بيتعبوا اكتر ، وفي منهم بيبقوا عارفين بس برضو بيجربوا ، حبيت اخد باايديهم لطريق النور واجبلهم شغل كمان
• ازاي؟
• بخليهم يشتغلوا ممرضين في الفيلا والبنات يااما بيشتغلوا تمريض يااما في المطبخ
• وبيدفعوا فلوس كتير بقي زى المستشفيات؟
• بصي اللي قادر يدفع بيدفع واللي مش قادر مش بيدفع
• طب وبتصرف عليها منين؟
• من التبرعات والناس اللي بتقدر تدفع بس
وعملت الروف للقعدة الحلوة ، عملت نقطه خضراء في الروف و زرع ، بقي كل ما واحد يتعالج بجيب زرع واسميه علي اسمه ، وعلقت بوسترات وعملت ركن كأنه كافيه كدا
• طب انتِ عارفة في بنت و ولد كانوا مُدمنين واتعالجوا واشتغلوا وحبوا بعض وخطوبتهم كانت الاسبوع اللي فات وعملنا ليهم احتفال كدا علي الضيق وفرحناهم
تحسي ان كلنا بقينا عيلة حقيقي كلهم بيحبوا بعض ومعاملتهم كويسه سوا ، وكلهم هناك بيحبوني اوي وانا مبسوط ب كدا
ومبسوط اني قدرت اغير حياة كل الشباب دي واخليهم مبسوطين
• ازاي عملت كل دا لوحدك؟!
• بصي يا جميله اللي عايز يعمل حاجه هيعملها واللي بيجتهد هينجح واللي بيتعب هيوصل ، الحياه حلوة اوي يا جميله بس احنا اللي مصعبنها علي نفسنا ، انا دايماً عندي امل وهفضل دايماً بحلم واحقق اللي بتمناه وبكدا هبقي عايش مبسوط ، احنا بنشوف الحياه بعنينا يعني لو شوفناها سودا هي هتفضل سودا فعلاً اما بقي لو شايفنها حلوة فهي هتفضل حلوة ومهما الحياة ضاقت وحصل ظروف صعبه فهي هتعدي ، الحياة من غير مشاكل متتحبش والحاجه اللي بتيجي سهله من غير تعب برضو متتحبش ، لازم نحب الحياه ونتعب ونجتهد مهما الظروف حاولت توقفنا ومهما اتقفلت لازم نبقي عندنا امل ونرضي ، اهم حاجه الرضا يا جميله ، لازم دايماً اكون عارف ان ربنا مش بيعمل غير الخير وارضي بقضائه ، طول ماانا راضي هفضل مبسوط
كنت ببصله بااستغراب ، سليم شاب طموح اوي ، يمكن اللي هو عمله اي حد هيشوفه حاجه بسيطه بس هو بالنسبه له إنجاز ، الفكره في انه حلم وصمم وتعب لحد ما حقق اللي بيحلم بيه ، ومش هو بس اللي بقي مبسوط لا دا ناس كتير بقوا مبسوطين وحياتهم اتغيرت وبقت احسن بسببه ، شباب كتير في سِنه لسه بياخدوا مصروفهم من ابوهم وشايفين الدنيا صعبه ومقفله وهما مش بيحاولوا يشتغلوا حتي!
فوقت من شرودي علي صوته وهو بيقول:
• ايييه سرحتِ في ايه؟!
• انت جميل اوي يا سليم
اتكسف وبص في الأرض وهو بيقول: مُتشكر جداً يا جميله
• ايه دا!!!
• في ايه!!
• هو انا قولت ايه؟! قولتلك انت جميل اوي؟!
• اه
• اتوترت_انا..انا مقصدش والله يا سليم انا الكلام طلع مني بتلقائية من غير ما اخد بالي والله مقصدش
• ضحك_فى ايه ياابنتي ولو تقصدي يعني انا عارف انتِ تقصدي ايه
• طيب انا لازم امشي
• خلينا قاعدين شوية
• معلش بس انا اتأخرت
• ماشي ياستي ، هبقي اكلمك
• ابتسمت_ماشي
مع السلامه
• سلام
مش عارفة ازاي سرحت فيه وقولت كدا ، الكلام طلع مني بتلقائية من غير ما اقصد
سليم قِدر يخليني اتأكد اني بحبه ، حتي لو زمان كان مُجرد إعجاب زي ما أسماء قالت ، بس دلوقتي اتأكدت اني بحبه
كان باقي شهر علي إفتتاح الجاليري وكنت متوتره اوي ، سليم وقف معايا في الفتره دي وكان مقدر قلقي وخوفي وبيساعدني اني اهدي عشان اعرف اكمل ، خلصت اللوحات وراحت الجاليري قبل الافتتاح بااسبوع وحمدت ربنا ان اللوحات عجبت استاذ عيسي
وعدت الايام والنهارده الافتتاح ، سليم وقتها كان واقف معايا ومبسوط بنجاحي اللي هو جزء منه ، كنت مبسوطه اوي بوجوده جنبي ، لو هو مكانش موجود جنبي وبيدعمني انا عمرى ما كنت هوصل للي انا فيه دلوقتي ، وقفته جنبي ومساعدته ودعمه ليا هون عليا كتير اوي ، سليم كان سند و ونس..
• سليم!
• نعم يا جميلة
• شكراً
• علي ايه؟!
• وقفت معايا وساعدتني ودعمتني من غير ما تستني مني مقابل ، غير انك كنت بتسمعني وقت ما اكون متضايقه وبتحل مشاكلي من غير ما اطلب منك وانت مش مضطر تعمل كل دا ، حقيقي يا سليم انا مُمتنه لوجودك جنبى ، لو انت مش موجود انا مكنتش هعرف اوصل لكل دا
ضحك المره دي ضحكه سعيده من قلبه وقال:
دا واجبي يا جميله ، حقي عليكِ يعني مش بعمل حاجه زياده
• ازاي بس انت مش مضط...
قاطع كلامي وهو بيقول:
• جميله
• نعم
• عارفه ، انتِ شبه الورد الابيض
• ازاي؟!
• الورد الأبيض نقي وبيدل علي الهدوء والسلام والطمأنينة
انتِ نقية اوي من جواكِ يا جميله ونضيفه ، بحس معاكِ اني متطمن ، طول ماانا معاكِ ببقي مش عايز الوقت يعدي ، انتِ الوحيده اللي بتكلم معاها من غير تكاليف ، يعني من غير ما اخد بالي من كلامي ، من غير ما اخاف انك تفهميني غلط ، مغلطوش لما سموكِ جميله ، انتِ اسم علي مُسمي ، اسمك جميله وانتِ جميله فعلاً
اخد نفس عميق وابتسم قبل ما يقول:
في اغنيه كدا بتقول "القلب يعشق كل جميل"
وانا عشقتك يا جميله
فاجئنى! كنت مبسوطه اوي وعايزه اجرى واقول "اللي بحبه طلع بيحبني يا ناس"
اخدت نفس وانا ايدي بتترعش وحاسة اني بحلم وقولت:
اغنيلك؟
• اييه؟!
• حاسه اني عايزه اغنيلك
• يلا يا ياسر سمع عمو
• "أمانه عليك يا ليل طوِل وهات العمر مـ الأول
بحب جديد و قلبي سعيد يا ريتني عشقت عمنول
أمانه أمانه .. أمانه امانه .. أمانة يا ليلي يا ليل"
اختاروا ناس بسيطه ، ناس متحسوش معاهم بتكاليف ، ناس تتكلموا معاهم براحتكم من غير ما يفهموكم غلط ، ناس يقبلوكم بعيوبكم قبل مميزاتكم ، ناس تدعمكم وتفرح بنجاحكم ، ناس تبقي سند ، ناس تبقي ونس..