• انت ليه وافقت تتجوزنى يا أسر؟!
• مُجبر يا نادرة ، مُجبر زيك
• بس انت راجل
• انا راجل بس في حاجات بتبقي اكبر من قدرتي
شوفي يا نادرة ، احنا صعايده وعشان كدا أهلنا شايفين ان البنت مينفعش تتجوز حد غريب حتى لو الطرفين مش موافقين
• بس احنا ذنبنا ايه يا أسر!
• ذنبك ان ابوكِ قِدر يجبرك
وذنبي امي اللي حلفت اني لو متجوزتكيش هتغضب عليا ليوم الدين
وانا مقدرش علي كدا يا نادرة
• هنتعامل ازاي كزوج وزوجه واحنا مش بنحب بعض!!
• هنتعامل زي الأخوات يا نادرة ، زي ما اتعودنا واحنا صغيرين
انتِ نادرة بنت عمي ، اختي الصغيره اللي مكانتها عمرها ما هتتغير
وانا أسر اخوكِ الكبير اللي بتحبي تحكى معاه لما تكونى متضايقه وتاخدى رأيه في كل حاجه تخصك
نزلت دموعها علي خدها قبل ما تقول:
ليه وصلونا ل هنا؟!!
• عشان دي دماغهم ، ودول أهلنا ومضطرين نعمل اللى هما عايزينه يااما هنخسرهم
وعشان كدا كنت عايز نتفق
• نتفق علي ايه؟!
• احنا هنعيش في القاهره ، كمان كام يوم هنمشي
وهنعيش اخوات ، وكل واحد يعمل اللي هو عايزه ، بس قبل ما ناخد خطوة مهمه في حياتنا هناخد رأى بعض الاول ، زي ما كُنا بنعمل طول عمرنا
وبعد كام شهر ننفصل ونقول اننا متفقناش
اتفقنا؟
• اتفقنا.

بعد اسبوعين نقلت شغلي وحياتي كلها في القاهره
حياتنا كانت مستقره ، بس مش قادرين نقبل فكره جوازنا ، كل واحد فينا حابب يعيش الحياه اللي يتمناها بالطريقة اللي تعجبه مع الشخص اللي قلبه يريده ، بس الحياه حُكمها كان أقوى مننا

• أسر
• نعم يا نادرة
• عايزه اتكلم معاك في موضوع ، ممكن؟!
• جداً
• انا عايزه افتح محل كتب و ورد
• حلو ، بس ليه الاتنين سوا؟!
• عشان الكتب و الورد هما من اكتر الحاجات اللي بحبها
ابتسمت قبل ما اقول: طول عمرك بتحبي الورد والقراءه فعلاً
طب احكيلي اكتر عن مشروعك الجميل دا
ابتسمت بحماس وهي بتقول:
بص يا سيدي انا طبعاً بحب القراءه والورد جداً عشان كدا حابة افتح محل كتب و معاه ورد
وكل كتاب معاه ورده هديه ومرسال
وكل بوكيه ورد معاه كتاب هدية و مرسال
• فكره حلوة جداً ، تعرفي اني اتحمست لها اوي
ضحكت وهي بتسقف باايديها وتقول:
بجد!! انا مبسوطه اوي
طب هنفتحه امتا بقي؟!
• سبيني طيب ادرس الموضوع واشوف التكاليف وادور علي محل في مكان كويس وكدا
• بس بشرط
• ايه هو بقي؟
• انا اللي هشيل كل تكاليف المحل
• لا يا نادره مينفعش انتِ مسؤولة مني و...
• أسر
دا حلمي من زمان ، ومشروعي اللي حابه اعمل فيه كل حاجه بمجهودي عشان احس بنجاحي
فبعد اذنك خليني اعمل اللي حباه
اتفقنا؟!
• اتفقنا

بعد شهر فتحنا المحل
علي اليمين ورد وعلي الشمال كتب وفي النص جرامافون عشان صوت فيروز اللي بيدفي المكان ويعمله جو جميل

بتجبلي منه تذكار..شى ورقه وشى صوره
ع الورقة يكتب اشعار..واسمه علي الصورة
لما بتبكي المواويل..يسأل عن أهل المنديل
يا مرسال المراسيل..سلم ع حبيبي
خدلى بدربك هالمنديل..واعطيه لحبيبي.

• يا روقانك
• أسر!
انت مش في شغلك ليه؟!
• قولت استغل ساعة البريك وابقي اول حد يشترى كتاب منك
ضحكت بسعاده في نفس اللحظه اللي قالت فيها:
يا سلام
دا انا عيوني ل أسر باشا
المحل كله تحت امرك يا باشا
اختار الكتاب اللي يعجبك بقي
• اختاريلي انتِ
• عيوني
• ومعاه الورده والمرسال ، اوعي تنسي
• حاضر
دي رواية اسمها "لأجلى مرة اخيرة" ، جميله اوي هتحبها
مسكت الكتاب وانا بقرأ الاهداء:
لى ، ولكِ ، ولهن..
جميعاً نستحق الحب.

• باين انها جميله من الاهداء
• هتحبها اكتر لما تقرأها
• مش انتِ اللى اختارتيها ، يبقي لازم احبها
• واختارتلك كمان اللون الأبيض من الورد عشان بحبه
ودا المرسال
اخدت منها المرسال ، كان مرسوم عليه شلبي ومارد وشوشني
ابتسمت بهدوء علي طفولتها الجميلة وانا بقرأ المرسال:
لازم تعرف ان صداقتنا اهم من اي حاجه.♡!
• جميل اوي المرسال دا.
زيكِ
ابتسمت بخجل وبصت في الأرض في نفس اللحظه اللي ادركت فيها اللي قولته
بصيت لها بتوتر وانا بقول:
انا اسف ، معرفش ازاي قولت كدا
• ولا يهمك
انا فهماك
ابتسمت بهدوء وانا بقول:
انا همشي عشان الشغل
وعشان المرسال الجميل دا بقي..بعد الشغل هعزمك علي شاورما سورى من اللي بتحبيها
ابتسمت المره دي ابتسامه كلها سعاده:
الله بقي ، موافقة جداً
• خلاص هعدي عليكِ بعد الشغل
• هستناك
• اتفقنا.

عدى ٣ شهور
مشروع نادرة بدأ ينجح ، كنت مبسوط بيها ، مبسوط ب بنتي اللى يعتبر متربية علي ايدي من واحنا أطفال ، مبسوط بنجاحها الجميل ، مبسوط بفرحتها بمشروعها وبنجاحها
كنت حاسس انى جوايا حاجه غريبه ، احساس غريب مش فاهمه ولا عارف اوصفه
قررت اني هحاول اوصفه بالكتابه ، هكتب جوابات كأنى بحكى ل نادرة
جبت ورقه وقلم وبدأت اكتب:
جوايا شعور غريب ، مش فاهمه ولا عارف اوصفه
انا حابب وجودكِ في حياتي ، حابب كلامك ، وهزارك ، وعصبيتك ، حتى همسك بحبه
تعرفي انى اكتشفت ان ملامحك جميله اوي ، ملامحك هادية وصافيه وجميلة ، مش عارف ازاى طول السنين دي كنت بشوفك عادية! ازاي طول السنين دي مشوفتش الحُسن الربانى والجمال دا ، انتِ شئ جميل في حياتي يا نادرة
مش عارف اللي حاسه دا ايه! بس اللي متأكد منه انى بحب اشوفك ، عايزك دايماً قُصاد عيني ، عايز اتأمل في ملامحك ، عايزك جنبي ، حابب وجودك ياستي

صارلى شى مية سنة .. مشلوحة بهاالدكان
ضجرت مني الحيطان .. ومستحية تقول
وانا عيني علي الحلى .. والحلى علي الطرقات
غنيلوا غنيات .. وهو بحاله مشغول
نطرت مواعيد الأرض .. وما حدا نطرنى

• ايه ياابنتي السواد اللى انتِ عايشة فيه دا !
ليه قافلة انوار المحل كدا ، وايه الاغاني الحزينه دي!
بصتلى بعيون كلها حزن:
عشان الدنيا بقت باهته فعلاً
• ليه كل الحزن دا؟!
• هو في حُزن غير اكتر من اللي احنا عايشين فيه!!
• مش فاهم
• متشغلش بالك
المهم انت جيت ليه في حاجه؟!
• النهارده اجازتي وحبيت اقضي اليوم معاكِ
• اترسمت علي وشها ابتسامه باهته: كويس
• شكلك حلو اوي النهارده
• بجد!
• اه بجد
• مع انى النهارده متضايقه اوي وحاسة شكلي وحش
• انتِ كدا كدا جميله مهما اختلفت تعابير وشك
بس احكيلي مالك
• حاسة اني مش مبسوطه ، اه حققت جزء من الحاجات اللي بتمناها بس في حاجات كتير ناقصه
• ايه هي الحاجات اللي ناقصه؟!
• انى اتجوز شخص بحبه وبيحبني ونعيش مع بعض في بيت دافى يملاه الحب ونحقق احلامنا سوا ، ويتمني نجاحي ويفرحله ، واشوفه بينجح قدام عيني وانا بشاركه نجاحه وفخوره بيه من كل قلبي ، ونخلف أطفال تشهد علي حُبنا الجميل دا
اتنهدت بحزن:
بس جوازنا هد كل حاجه
انا مقصدش انك وحش يا أسر ، بس احنا مش شايفين بعض اكتر من اخوات ومش هنقدر نبقي مبسوطين سوا
• طب ايه رأيك نحاول نغير نظرتنا في بعض
• ازاي؟!
• ندى لبعض فرصة ، ولنفسنا ، يمكن يحصل ونحب بعض
نجرب
• لا يا أسر ، لو فشلنا مش هنعرف نرجع اخوات واصحاب تاني زي دلوقتي
• لو فشلنا هننفصل بهدوء ، وهنفضل اخوات زي مااحنا
مش يمكن ربنا كتبنا من نصيب بعض عشان نشوف حاجه عمرنا ما كنا هنشوفها غير بالطريقه دي!!
اكيد ربنا كتبلنا الخير ، بس مش يمكن الخير دا هو الحب!
اتنهدت تنهيده طويله وسكتت ، تنهيده بتعبر عن اللغبطه والحيرة والحزن اللي مالكين قلبها
• نادرة! انا بقيت بشوفك جميله
• هو انا مكنتش جميله قبل كدا !
• كنتِ جميلة طول عمرك ، لكن انا أول مره الاحظ ان ملامحك هادية وجميله بالشكل دا
عارفه دا معناه ايه؟!
• ايه؟!
• اني بدأت اشوفك بطريقه تانيه ، قلبي بدأ يدق عشانك وعقلي مشغول بيكِ ، وعيون المُحب بتشوف العادي جميل يا نادرة
وانتِ اساسا كنتِ جميله لما كنتِ بالنسبة ليا اخت ، فتخيلي لما بقيت بشوفك حبيبتي جمالك زاد قد ايه!
كسوفها زاد وظهرت رعشة ايديها اللي فشلت في انها تخبيها
• حاضر ، هحاول
ابتسمت بسعاده ودي اول مرة ابتسم كدا من فتره:
هنحاول ، هنحاول يا نادرة
وخلال الفتره دي كل ما نحس بحاجه نكتبها في جواب
ابتسمت_جواب!!
ايه جو ايام السابعينات دا !
• وهو في اجمل من ايام السابعينات والجوابات ، ايام سعيده يا هانم ومحمد عبد الوهاب وأم كلثوم
• كانت ايام جميله فعلاً ، كنت بتمني اعيشها
• خلاص يبقي نعيشها في أيامنا دي
• اتفقنا

عدى شهر ، شهر بالجوابات اللي اتفقنا نكتبها لبعض ، وكلامي الحلو اللي طول الوقت بيقصدها وحبي ليها اللي بيزيد يوم بعد يوم ، وايامي اللي بقت كلها فرحه وسعادة من وقت ما قلبي دق لها
وكلام القصائد اللي بيوصفها وكأنه اتكتب عشانها هي وبس ، عشان عيونها ، اااااه من عيونها
كل حاجه بدأت تبقي حلوة

بعدك علي بالى .. يا قمر الحلوين
يا زهرة بتشرين .. يا ذهبي الغالي
بعدك علي بالي .. يا حلو يا مغرور
يا حبق ومنتور .. علي سطح العالي

• يا سيدي يا سيدي ، مين بقي اللي علي بالك؟!
• ابتسمت_أسر!!
حقك عليا ملحقتش اشوفك الصبح قبل ما تصحي عشان كنت مستعجله
• ولا يهمك يا نادرة
• مقولتليش رأيك في الرواية
• علي قد ما هي حزينة بس جميله عشان انتِ اللي اختارتيها
ابتسمت بكسوف_شكراً بجد يا أسر
• افتحى كدا صفحه ١٧٢ واقرأى السطر التاسع
"أحبك وأريد أن أكون معك ، وبكِ ، وفيكِ ، أريد أن أكون اول طريقك وآخره ونسير الخطوات معاً.أريد أن ابقي بقلبك يا آسيا ، انا أحبك"

قررت اخيراً اعترفلها بحبي بعد ما اتأكدت من كلامها في الجوابات ان قلبها بدأ يدق ليا ، ليا وبس
و رغم كدا قلبي دق ورعشة ايدي ظهرت وكأن قلبي خايف انها ترفض
في اللحظه دي بصيت في عيونها بحب:
قررت مبقاش مغرور زي ما فيروز قالت
"أريد أن ابقي بقلبك يا نادرة ، انا أحبك"
العمر محتاج ونس ، وانا نفسي اتونس بيكِ
عدت لحظات من الصمت ، لحظات بس كإنها سنين
• متأكد يا أسر انك بتحبني وعايزني؟!
• انا مش عايز ولا رايد غيرك
نفسها بدأ يبقي سريع بطريقة ملحوظه ورعشة ايدها ظهرت وهي بتاخد نفس عميق وبتبص في الأرض بخجل:
• انا كمان بحبك يا أسر ، ومش عايزه ولا رايدة غيرك
اتنهدت براحه وانا بتأمل ملامحها اللي محبتش قدها
اخدتها في حضني كأني بعوض قلبي عن كل ذرة حب وشوق ليها جوايا

شئ جميل لما نلاقي ناس حنينة نحس معاها بالأمان ، ناس تحبنا من قلبها ، تحب روحنا ونتطمن معاهم ، ناس تطمنا كل دقيقه أن عمرهم ما هيملوا مننا ولا يمشوا ، ناس زعلنا ميهونش عليهم ، ناس تشبهنا ونرتاح معاهم ، ناس يكونوا ونس.

• احكيلي بقي نفسك في ايه او محتاج ايه؟!
بصيت في عيونها وابتسمت:
• وهو اللي يلاقي نفسه جنب حبيبه هيحتاج ايه تاني من الدنيا؟!