= انت مش بتحبني 

- ازاي يا حبيبتي ، انا بحبك جدا 

= انت بتحبني بنسبة 20٪ بس 

- اشمعني يعني 20٪ في المية ، مينفعش 37٪ مثلا ؟ 

= لأ هما 20% بس .. 

- بس ده احساس غلط يا حبيبتي 

= ليه ؟ ؟ .. انت دايما مش بتقدر احاسيسي خالص .. هئ هئ 

- احاسيسك علي دماغي يا روحي لما تكون منطقية .. ليه بقه ؟؟ .. لأن النسبة لازم تكون مقاسة كروسبوندينج لشئ معين ، يعني مثلا أنا بحبك بنسبة 20% من حبي لجارتنا سعاد ؟ ، و لا 20٪ من حبي للبسلة بالجزر ، و لا 20٪ من حبي للسيارة و هي طالعة من الصيانة .. ، حاجه كده ، اما نقول 20% بالمطلق كده .. الكلام لا يستقيم .. انا كده هتظلم

= مين سعاد دي ؟؟؟ 

- فور اجزامبل يا حبي .. مجرد مثال توضيحي .. ما انت عارفه ان مفيش جارة لينا اسمها سعاد .. مفيش غير سماح و عطيات و فتكات .. 

= هو انا في محاضرة استاتيكا هنا .. هو انت حبك ليا لا يزيد عن 20% مش اكتر .. 

- واحدة واحدة يا حبيبتي ،هو ايه اصلا وحدة قياس الحب ده ؟! .. ، كيلو مثلا .. طن .. و لا متر مكعب .. و لا 40 جرام دهب .. و لا ايه؟؟ 

= انت مصمم بردو تتكلم معايا علمي .. و تفقع مرارتي اكتر ما هي مفقوعة يا بتاع سعاد انت .. 

- لا يا حبيبتي .. انا بس ببذل قصاري جهدي عشان افهم ..و بجد عاوز اعرف المزيد من المعلومات عشان احط خطة لرفع النسبة دي بالتدريج لغاية ما توصل ل 90% كده في أقرب وقت .. 

= 90٪ .. !!! .. شوف الراجل بيقول ايه. ؟؟ .. و متبقاش ليه 100٪ يا بشمهندس ؟؟؟ 

- ما انت عارفه ان الكمال لله وحده .. و لازم الواحد يحط safety factor .. و كده .. 

= ارحمني ... خلاص انا اسفه .. تحب تتغدي و لا بلاش عشان الكرش يتهد .. 

- انا ما يخلصنيش انك تكوني زعلانة بجد .. ، طب بلاش وحدة قياس الحب.. قوليلي بس الجهاز اللي انت قيستي بيه نسبة ال 20٪ .. و انا هتصرف و اعرف وحدة القياس و هرفع النسبة ان شاء الله.. متقلقيش 

= انا رايحه عند أهلي ... ، يوم ازرق اللي اتجوزت فيه واحد من بتوع فيثاغورث .. ، كان ماله الميكانيكي اللي تحت بيتنا .. كسيب و لسانه حلو .. 

- لو سمحت .. نظرية فيثاغورث دي بياخدوها في تالته اعدادي .. انا راجل واخد اوبتمال كنترول و تريتمنت .. انا مستوايا اعلي من فيثاغورث بكتير !!!! 

= طلقني .. 

------

= مالك يا صديقي مكتئب ليه كده ؟

- اتخانقت مع مراتي و مش عارف ليه ، الموضوع تافه و انا كالعادة مظلوم .. .. 

= معلش كل الستات كده ، قلي ايه الشئ التافه ده من وجهة نظرك ؟ 

- و لا حاجه يا سيدي ، بتقولي بحبك بنسبة 20% فقلتلها وحدة القياس ايه و ايه هو جهاز القياس المستخدم .. و النسبة نفسها مقاسة من ايه .. بس 

= انت رديت عليها كده ؟؟؟؟؟ 

- أيوه .. عشان افهم .. و ارفع النسبة

= و هي ردت عليك ازاي ؟ 

- الاسطوانة اياها المكونة من ثلاث مصطلحات رئيسية .. مش حاسس بيا ... انا رايحة عند اهلي .. طلقني .. 

= و انت عادد المصطلحات كمان؟!

- طبعا .. عشان لو عددهم زاد لأربعة مثلا .. كده الوضع هيبقي خطير .. لما بيفضلوا تلاته .. باعرف انه الشريط السافف بتاع كل مرة .. 

= انت عارف ان مراتك دي صعبانه عليا ؟ 

- ليه بس .. انا عملت ايه.. 

= واحدة بتقولك انت بتحبني بنسبة 20٪... تقولها بردو وحدة قياس .. و كثافة و حجم ؟؟ .. ده كتير كده يا هندسة 

- هو انت كمان هتعمل زيها ... امال اقولها ايه .. ؟؟ .. هو انا عارف اصلا جابت النسبة دي منين .. ؟؟ 

= يا صاحبي يا حبيبي .. انس ام الهندسة دي و خليك معايا 

- يا دي الهندسة اللي انتم ماسكين فيها .. انا بتكلم بالمنطق .. المنطق يا صديقي 

= و انس المنطق كمان 

- ايه ؟؟؟ .. انس المنطق .. ازاي الكلام ده .. 

= طالما بتكلم واحدة ست تنس المنطق و الهندسة و التعليم كله .. 

- خليني ورا فلسفتك العجيبة .. قول يا صديقي 

= واحدة بتقولك انت بتحبني بنسبة 20٪ بس... ترد عليها بايه ؟ 

- قول يا ابو العريف .. اقولها ايه .. ؟ 

= قلها : لا يا حبيبتي .. انا بحبك بنسبة 120٪ .. و تسكت 

- بس كده !!! .. بالبساطة دي !!! 

= ايوة بالبساطة دي .. هتلاقيها تفتح بقها و تضحك و تدخل تعملك اكلة حلوة 

- و هو المطلوب اثباته .. 💪

= اثباته ايه بس يا عمنا ، انسي ام الاثباتات دي .. و خليك معايا

- طيب افرض يا صديقي سألتني انت جبت نسبة ال 120٪ دي منين و علي اي اساس .. ساعتها ارد انا ازاي بقه ؟؟!

= بقولك ايه يا صديقي متقلقش ، دول ستات ، دي بتنكشك بس .. هي لا بتفكر في نظرية علمية و لا وحدة قياس .. دي عاوزاك تضحك عليها بكلمتين و خلاص .. 

- طب استفسار بسيط معلش يا صديقي ..

= اتفضل 

- هو ليه اقول 120٪ .. ما اقول 100٪ و خلاص .. عشان تبقي اجابة أقرب للمنطق و سهل تفسيرها علي اسس لوجك .. 

= لوجك !!!! ... طلقني يا صديقي .. حالا .. ..