بقالي فترة مش بانشر حاجة على البروفايل ومقصرة مع حبايبي من العيلة والأصدقاء ومن زملائي وأساتذتي.. بس عشمي في إن الحبايب بيعذروني هو نفسه عشمي اللي بيخليني أشارككم خبر حلو بيهون حاجات كتير في الأيام الغريبة دي.. 

زي خبر تفوق حبوبة..

الحمد لله رب العالمين.. الجميل مش بس في ارتفاع نسبتها وتفوقها على نفسها... ولا هو بس في تقدير مدرستها ومدرسينها ليها.. على قد عظمة كل ده.. بس الأعظم بالنسبة لي هو في إصرارك يا حبوبة على إنك تعتمدي دايما على نفسك.. ورغم انشغالي والتحديات الكتير.. عملتي كل جهدك عشان تحافظي على تفوقك.. اللي بيظهر في أخلاقك قبل دراستك.. واللي بيخليني دايما أحمد ربنا وأدعيه يحفظك ويحفظ كل ولادنا ويقدرنا نكون قد الأمانة دي.. وبتعلميني إن دوري في حياتك الأهم هو إدراك قوتك وموهبتك.. وترك المساحة الحرة ليكي عشان انتي تختاري طريقك.. 

يعني انتي عارفة كويس إن آخر همي الدرجات والترتيب وأعظم همي إنك تكوني يا حبوبة راضية وسعيدة ومسامحاني على تقصيري معاكي غصب عني.. بس أنا كمان عارفة إنك اخترتِي طريق التفوق والمسؤولية والبراعة في اللي بتعمليه. ووصيتي ليكي إن ده ما يكونش على حساب سعادتك وراحة بالك وقلبك.. يا حبيبة قلب ماما.. يا رب كل سنة يا حبيبتي أحتفل بيكي وتكوني سعيدة.. ويكون قلبنا مطمن أكتر على أهلنا واخواتنا وحبايبنا في كل مكان فيه معافرة وتمسك بالحق