ماااا تحلميش

لو سيبت أرضي

أهلي وناسي

زرعي وفاسي

وجيت أدور على لقمة عيش

فماااتحلميش

*****************

لو زاد فقري

وقل خيري

وهجرني طيري

وهجرت بلدي

علشان أعيش

فمااتحلميش

إني أهين أصلي وعرضي

إني أبيع طيني وأرضي

عشان إنتي ترضي

مااتحلميش

****************************

ده أنا اللي مهما دار بيا الزمن

ما بنحنيش

أنا المصري وراسي عالية

أتعب

أشقى

أتغرب للقمة عيش

لكن مكان ما أحط رجلي

كرامتي غالية ومتتشريش

فماااتحلميش

****************************************

ماااتحلميش

اني أركع تحت رجلك

عشان شوية ملاطيش

أو أبيع أرضي وعرضي

واخلع بإيدي جذور تاريخي

اللي من قبل جدود جدودك

سارية في أرضي

عشان إنتي ترضي ؟؟!

****************************

معذورة ما انتي  جاهلة

ومتعرفيش

فماتحلميش

وعايزة الدفاتر تنقرا ؟؟

مابلالاش يا صغيرة

اقري تاريخك وفي يدك

أهو صفحتين على أدك

وبلاش دفاتري لتهدك

وأمري واحكمي في خدامك

محناش خدم

ولا زرعة طالعة من العدم

إحنا التاريخ وإحنا الأصالة

وإحنا اللي رافعين العلم

إحنا اللي ندافع ونحمي

لما كان الخوف جواكي يسري

*******************************

وإن كنتي جاهلة وماتدري

فاسألي أستاذك ماهو مصري

يزيل جهلك وأوهامك

زي ما اللي داوى جرحك وآلامك

واللي شال همك وأوجاعك

واللي حمى أهلك وأتباعك

وقت ما الكل باعك

برررضو مصري

***********************

واللي بنى بيتك وقصرك

واللي وقت الشدة ناصرك

بيبني فيكي  ويعلم

من غير مايعاير  ويتكلم

يتعب ويتغرب وويتألم

لايتوجع ولا يشكي

ودايما خيره جواكي بيسري

ماهو ده المصري

****************************

بين الصفوف دايما قدام

لاكان شحات ولا كان خدام

طول عمره عايش زي الحمام

يلف الكون على لقمة عيش

وبعزة نفسه وكرامته دايما يعيش

فماااا تحلميش

 ياللي متعرفيش

*********************************

واحكي يا مصر للي شايف واللي سامع

عن الكنيسة اللي حاضنة الجامع

عن الأصالة والحضارة والفنون

عن ترابك اللي لكل غريب

حضن وحنون

عن أرضك اللي شايلة

كل جنس وكل لون

****************************

احكي عن حروبك والأمجاد

وفكري كل اللي جاحد واللي قاسي

واللي كنت بقول عليهم أهلي وناسي

واللي لحم كتافه من خيري وناسي

احكي وقولي بأعلى صوت

أنا اللي وهبت ولادي للموت

لاجل ماتحيوا من العدم

مكانوش عبيد ولا خدم

جولك في وقت الذل والألم

ومسحوا دموعك ورفعوا العلم

ورجعوا لحضني

بس في كفن

مكانوش عبيد ولا خدم

**********************************

كانوا رجال طول الزمن

حفروا تاريخهم في اليمن

لا طلبوا حق ولا تمن

*******************************

واحكي يا بلدي للجاهلين

عن ولادك في فلسطين

جرحها جرحي من تمانية وأربعين

وكتف  ف كتف ليوم الدين

والله ورجالة المصريين

لا عندهم دهب ولا زيت

بس بطولاتهم علامة

في كل شبر وكل بيت

وتشهد عليهم أرضك

أرض الكويت

********************

واحكي يابلدي متسكتيش

لكل جاهل مايساويش

وانتي يا جاهلة متحلميش

واقري تاريخك وفي يدك

أهو صفحتين على أدك

وبلاش دفاتري لتهدك

وأمري واحكمي في خدامك

محناش خدم

ومهما إن عليتي وطالت إيدك

هيفضل دايما  المصري سيدك