كل ما افتكرك بنسى حاجات كتير

بنسى نفسي والاقيني تايه

واحس الدنيا بس شوية ذكريات

بفتكرك يوم ماعرفتك طفلة شقية

وبفتكرك يوم مافارقتي

 وأقول مش هيا

بين دمعي والضحكة

بين حزني والفرحة

بقى عمري كله ذكريات جارحة

بقتكرك بدموع عنيا

وقلبي من جوايا يقول مش هيا

نفس الملامح نفس الشكل

نفس الطول ونفس العرض

لكن يا خسارة على حبك

سنين خلاني طاير في السما

وفي لحظة

رجعني تاني لسابع أرض

كل ما افتكرك بنسى حاجات كتير

بنسى عمري اللي ابتدا يوم ماقابلتك

كام شهر وكام سنة وأنا عايش غريب ؟

غريب عن بيتي عن صحبي عن نفسي

كان حبك بس هو القريب

كام شهر وكم سنة هجرت حياتي

هجرت يومي هجرت أمسي

وكان قلبك بس هو الحبيب

كام ليلة سهرت مع صورتك

كام شهر وكام سنة بتمنى قربك

ياما سهرني حبك وقلت فداكي

وياما ضيعت من عمري اللي وهبته لهواكي

كام ليلة سهرت أكتبلك شعري

كلمة بتوصف رقة قلبك

وكلمة بتوصف لمسة ايدك

وكلمة بتوصف ضحكة عينك

ياما كتبت وياما سهرت

وياما من عمري ضيعت

و كل ما افتكرك بنسى حاجات كتير

بنسى الضحكة اللي كانت مصاحباني

بنسى شبابي بنسى فرحي

وافتكر الطفلة الشقية

كنت بسهر ليلي أوصف نور عيونها

فرحها ضحكها سكونها وجنونها

وهيا كانت برضوا بتسهر

تسهر توصف بس في جرحي

كل ما افتكرك بنسى حاجات كتير

لكن عمري ماهنسى يوم مافارقتي

يوم ماخنتي .. يوم ماغدرتي

يوم مابعتي كل ذكرى حلوة بينك وبيني

يوم ماهانت عليكي أيامي وسنيني

يوم ما  شفت ضحكة عيونك لحد تاني مش ليا

يومها نزلت دموع عنيا

نزلت مش عشان قلبي اللي هواكي

نزلت عشان عمري اللي ضيعته وقلت فداكي

نزلت عشان كل اللي راح من بين ايديا

تبكي عيوني عليكي كتير

وقلبي يقولي مش هيا

وقلبي يقولي مش هي