باقى م العمر سبع سنين
و ييجى عمر تانى
و يعدى العمر يعدى
كنه بيعدى فى ثوانى
و يطير الحلم من بطن العش
و ييجى حمام غيره يفقش
الدنيا صفوف و رفوف
زحام ترش الملح ما ينزلش
و المستعجل طير عشه
ايه يعيشله!
بيلم فى قشره و يصرخ جواه
،، كااام ما عفش،،
بتسيب الصافى و تخوض عكار
و تخش بقلبك ع النار
و الخوف جواك و ما بتبينش
خد حقك م الخوف
خد حقك م الرعشة
تراب و بيحمل للتراب تراب
على نعشه
اظبط ع البشر ساعتك
سيب الأحلام لو مش بتاعتك
تحتك سر المخلوق
و الطين ما يكلش
شكّل طينك ع الوقت
و احلم و ابنى لحلمك عش
كوم تراب لكن متكون من ذرة
اصبر بره و لم فى قش
لكن تصبر جوه!
تدخل كوه
تسحب تسحب
لكن تطلع؟!
ما افتكرش