..
صعيدى وخايب من دون البيت
لسه ف أولى وحبيت
وجريت على أمى وزعقت
يا امه بدر منور حتة بت
وقلبوا الدنيا ضحك وهرجه
وأنا عيل كنت ساعتها
سيبت الدنيا تغير جواى..
وهربت
ولما تعبت..دخان سيجارة
رجعنى لدنيا زمانها بقايا
وشربت
ركبت القطر عافية وسيرت
لفيت بلاد الله
ورميت أشجان هناك
كنت جبل ع الآه
ولملمت بقايا قلب بيستنّاك
وحفرت اسمه جواك
وغيبت
ياريتنى القطر ماركبت
من ساعتها وانا باندهلك
بس بعيد الصوت يوصلك
واتفرقنا ف سبل الدنيا
واتغيرتى...واتغيرت
كانت نظرة بعد ييجى
طناشر سنه
عصفورة فوق شجرة
لكنى تحت
لسه باجرى لأمى احكيلها
واسمع ضحكتها وعتابها
وبسافر ف نفس السكة
وبلملم ذكرى ف كل محطة
وجاه القطر....وركبت
طير شارد بيغرد قدام شباكك
والبيت مهجور
اوعى تقولى ايه وداك !!؟
والله لما بروح كإنك لسه هناك
والبيت معمور
وبشوف اللمبة تنور تطفى
زى ما اتعودنا السر ف النور
وارجع من نواحيكى لوحدى
بجر ف يدى طفولتى البكر
واتهيأت ..للسفرية الجاية
لكن لسه السيجارة
ما خلصت..فرجعت