الساعة دلوقتى كام
الساعة خمسة بالتمام
كل شيء محسوب عندنا بالثانية
الكهرباء قطعت وهترجع الساعة تمانية
النور قطع في المعاد
صلوا العصر يا اولاد
وادعوا رب العباد
الكهرباء ترجع فى المعاد
شيلوا فيشة التلاجة
والشاشة وافصلوا المروحة
جايز الكهرباء ترجع عالية
تحرق المواتير المولعة
ومتنسوش زر التكييف
اللى بقى عامل زى الضيف
بيزورنا على خفيف
زى النسمة المدلعة
قالوا الخير بيصب عندنا
أكيد هما أدرى مننا
وعارفين فين المصلحة
قالوا ده تخفيف أحمال
طيب وامتحانات العيال
الثانوية العامة والخوف منها يهد جبال
لا نوم ولا مذاكرة وقلق
وبيضيع مستقبل أجيال
أيه يعنى شوية حر
على شوية عرق
على شويتين زهق
نصبر بعضنا أحسن ما نتخنق
قالوا تخفيف ذنوب
عشان نرجع نتوب
أكيد عندنا عيوب
وألا الظلام علينا مكتوب
عارفين أن الصيف
أشد الفصول
لكن نرجوكم عايزين
سرعة حلول .