خلاص ارتحت
ماعاد بينا كلام قاسي ولا لين
طلاق بـيِّن
مافيش راجعه
حياتي معاك كما الأنفاس
يادوب طالعه ومش راجعه
حياتي معاك ضلام مش نور
بقيت كارهه أعيش ف الزور
بقيت عايشه وانا جنبك
جسد مبتور
غرورك مافي بعده غرور
ماكنتش ليا بمشاعرك
ظلمت الروح وانا جنبك
ورغم الظلم وقسوتك
كنت بحن وبسامحك
لكن طبع القسى غالب على قلبك
بتدبحني على طيبتي
على خوفي على ديني
وعلى عرضي
واقول عدي
مسيرها بكره تتعدل
وطبع القسوه يتبدل
بعت العشره وسنيني
وحناني عليك
راضيه وقولت يكفيني
القليل عندك
قسيت على روح كانت بتخاف
يجرح رمشها خدك
ياويل قلبك
وانا بادعي في ليل فجري
ورب الحق يرضيني
ومن عينك يجيب حقي

طلاق بَـيِّن
وكل الخلق شاهدينه
لاصُنت العيش ولا ملحي
وفعلك ربي بيدينه
يابايع عشرتي بالسهل
تدوق بَعدي عذاب بُعدي
ياحضن حنانه كان كداب
لاروح ولا قلب بيسعني
وكان قربك ألام وعذاب
وطول وقتك بتوجعني

طلاق بَـيِّن
صحيح العشره بتبين
مين فينا اللي كان على حق
خلاص ارتحت
في بُعدك راح يعيش مبسوط
قلبي اللي عاش وياك
وشاف الموت
لا هتجادل كلام في الحق
ولا امحي فكرك المغلوط