من صغري وانا شايفة اهتمام اخويا بجارتنا اللي ساكنة تحت مننا علطول 

بنت جميلة

بصراحة هي جميلة جدا وكل ملامحها تجنن وعيونها ملونين كان اخويا يقولي عيونها تخطف وتغوص وتحرق وتنقلني كل بلاد العالم وانا واقف مكاني ❤????

طبعا وبرغم اني اخته الكبيرة بس كنت ساذجة ومش فاهمة معنى كلامه 

المهم انه كان بيتبرجل اوي لو شافها 

وطبيعة اخويا انه متزن وهادي وقليل الكلام 

لكن بحس انه بقى انسان مختلف 

لو شاف منى

اسمها منى وكانت هي كل مناه 

حاول كتير يكلمها يتقرب منها

كل محاولاته باءت بالفشل 

مرة وسطني اكلمها خفت واترعبت لتقول لاهلها وامي تموتني 

لما لاقى نفسه محتار ومش عارف يعمل ايه 

كتبلها جواب 

ومن خيبته راح مديه لجارة تانية لينا من سننا وقالها توصلهولها 

جارتنا نزلت فعلا بس بغباء وسذاجة متأكدتش ان امها مش واخدة بالها 

فطبعا الام شافت الجواب 

وملحقتش منى تقراه 

وطلعت الام بمنتهى الغشامة والقسوة تتخانق معانا 

اخويا دخل وجري واستخبى ف الاوضة 

وكنت سامعه بكاه من برة وقلبي بيتقطع عليه 

لاني عمري ماشفته بيبكي ابدا

الحقيقة دا قواني اوي 

وخلاني خرجت بكل قوتي وكانت الجيران ملمومة وامي محتاسة بتحاول تلم الدنيا وابويا كان واخد الموضوع بعصبية وعمال يزعق قصادها 

وهي بتهدد عشان جوزها ظابط انها هتودينا كلنا في ستين داهية 

انا كل دا مهمنيش 

الا دموع اخويا 

خرجت لها كان جوايا قوة جيش بحاله 

وفضلت اصوت عشان تسكت وتسمعني 

ولما التفتت ناحيتي 

قولتلها والدموع مغرقة وشي 

انتي مجنونة 

انتي ازاي تفضحي بنتك كده 

ولنفرض ان اخويا غلطان 

تقومي تفضحي بنتك وتفرجي علينا وعليها خلقه 

اخويا بيحب بنتك بيحبها بجد ولو عشتي عمرك كله عشان تلاقي حد يحبها كده مش هتلاقي

انتي ست مجنونة 

خربتيها خلاص

هو عايز يتجوزها وبيحبها ليه بتعملى كده ؟؟!!!

اديهم فرصة بدل ماتفضحيهم كده 

ازاى انتي ام عاقلة الشارع كله عرف ان بنتك جالها جواب 

انتي هتنامي ازاى مرتاحة 

الحقيقة ان الصمت كان بيعم المكان 

وهي كانت بصالي ومبرقة ووشها احمر 

كانها ادركت لوهلة خطأها الفادح 

وان الحاجات دي متتحلش بعلو الصوت ابدا 

فمسكت الجواب وقطعته قدامي مية حتة ورمته ف وشي وبصت لامي وابويا بمنتهى القسوة والغل 

وقالت لهم لو ابنكم اخر راجل ف الدنيا مش هيتجوزها 

وسابتنا ومشيت 

الافظع من اننا نمشي بقية الجيران ونرجع نتمالك نفسنا تاني 

كانت حالة اخويا????

اخويا من ساعة لما دخل الاوضة وقفل على نفسه 

مخرجش هو اخويا اللي انا اعرفه 

خرج بعد محاولات كتير مننا ورعب امي ليأذي نفسه 

متغير وساكت اكتر من سكوته 

ورفض تماما الكلام عن الموضوع دا

حتى منى مبقتش بتنزل لوحدها 

وطبعا الام الهبلة خلت سيرة بنتها على كل لسان 

لدرجة انهم مستحملوش 

وكام شهر وعزلوا وسابوا الشقة والمنطقة كلها 

وسابوا قلب اخويا مفطور وخاوي على عروشه????

كان لسة داخل الجامعة 

شاب لسة اول حياته 

لكن ميعرفش ف الدنيا غير منى وحبها وكل طفولته وعمره اللي قضوها سوا لعب وجري وتنطيط 

مشيت منى من العمارة 

بس احساس ومشاعر اخويا مشيت معاها

كلنا حسينا انه اتغير تغير كبير 

دايما حزين 

عنيه حزينة

حتى نبرة صوته والله حزينة 

امي كانت مقهورة عشانه حاولت بكل الطرق تخرجه من حالته مقدرتش 

وتمر السنين والايام والعمر

ونفضل نتحايل على اخويا عشان يتجوز يبقى رافض رفض قاطع 

انا افتكرت انه خلاص نسي 

اتاريه منسيش 

لحد ماوجهته ف يوم وقولتله 

هو انت لسة بتحب منى ورافض انك تتجوز؟؟؟

مش ممكن انسى بصته وعنيه اللي اتملت دموع 

والغصة اللي خنقت صوته 

وقالي اوعي اوعي ف حياتك تجيبي السيرة دي تاني 

وبعدها خلى اصحابه وانا ندورله على اى واحدة بنت حلال يتجوزها 

وقد كان 

اتجوز وخلف 

لكن كل خناقات مراته معاه 

انها دايما تقولى اخوكي ساكت 

مبيتكلمش معايا 

دايما سرحان ومش بيتحاور معايا ولا يتناقش ابدا 

ولا بينا كلام غير الضروري 

كنت انا لما اتكلم معاه 

واقوله ليه كده 

كنت ببقى شايفة منى واقفة وسطنا 

منى لسة عاملة حاجز بينه وبين الحياة 

منى خدت روحه وهي ماشية وسابته عايش بلا روح

بيتكلم وياكل ويشرب 

بس مش عايش

حتى ضحكته مكسورة ومخطوفة

من الاخر منى بينه وبين الحياة

منى مشيت من العمارة من حوالي ٢٥ سنة 

اخويا قبلها كان بيضحك ويتكلم وكان رزين وهادي بس،كانت عنيه بتلمع والله ومنورة اوي والبسمة مبتفارفهوش

بعد ٢٥ سنة 

هو هو اخويا بس عنيه مطفية ووشه راح منه الضي 

وبقى ساكت سكوت بحس تحته بركان لو انفجر يمكن يرتاح 

مراته سالتنى بما انه اتجوز ف نفس شقتنا اللي عيشنا فيها ورفض نهائيا يسيبها بعد وفاة امي وابويا 

هو مين كان ساكن ف الشقة اللي تحتنا؟؟!

الحقيقة سؤالها فاجئني 

لدرجة ان لساني اتلجم 

ولما جمعت شجاعتي قولتلها بتسألي ليه 

بصتلي وقالتلي عندي فضول اعرف مين كان ساكنها 

اخوكي لو صادفت ونزلنا او طلعنا من النوع اللي بيبقى باصص ف الارض او قدامه 

بس نيجي ناحية الشقة دي ويرفع عينه ولازم يسند على بابها برغم انه طالع كل الادوار عادي بس هو لازم يقف عند الشقة دي 

ولما سألته كذا مرة 

قالي بشم نفسي وهطلع????

علما بان صاحب العمارة رفض يسكنها تاني،ومخليها لحفيده يتجوز فيها 

يعنى الشقة زي ماسبتها منى 

بنفس الباب بنفس كل حاجة 

الحقيقة المرة دي استجمعت شجاعتي 

وواجهته بكل اللي قالته مراته 

والغريبة انه سمعنى وهو ساكت تماما وعينه ف الارض 

ولما رفع عينه ف عيني 

لقيتها مليانة دموع سخنة تحرق القلب

وقالي لسة ريحة منى ف الشقة 

بشمها وانا طالع بتخليني اعرف اكمل حياتي????????????

وسابني ومشى 

لكن اللي قاله ممشيش ولا راح من بالي ولا وجداني ابدا 

الحقيقة ان الجملة دي هزمتني وكسرتني وخلتني مقسومة نصين 

ياترى الانسان ممكن حياته كلها تقف عشان ذكريات الطفولة وحب من طرف واحد؟؟!!!????????????

وخلصت الحدوتة????