في أحد الايام الغائمة يعنى اللي مليانة غيوم
بالمصري كده يوم مطلعتلوش شمس
يوم بارد وكئيب صدر قرار الامم المتحدة بالموافقة على تقسيم فلسطين بين الصهاينة
واصحاب الارض الاصليين والكلام دا كان في نهاية نوفمبر سنة 1947
وطبعا دا عمل حالة من الهيجان والغليان عند الشعب المصري
وعمل زخم ثوري في الشارع المصري
وبدأت التكتلات الثورية في الظهور وكان على رأس المشاركين فيها الفنانيين بقيادة الست تحية كاريوكا
عملت حفلات كتير كان بيروح دخلها كامل لأعانة المنكوبين والمجاهدين الفلسطنيين
هنطلع شوية سنيين قدام
لما قامت الثورة العظيمة ثورة
1952 كانت هي اكتر الفنانيين دعما وتأييدا ليها
لكن مع ازمة مارس سنة 1954
اختلط عليها الامر في فهم طريقة الحكم
وبدء يكون ليها اراء مناهضة للحكم العسكري
وبسبب تصريحها الشهير
" هو فاروق مشي وجه بداله فواريق"
اتفبض عليها وتم اعتقالها لمدة مائة يوم بتهمة قلب نظام الحكم
التصريح دا هي قالته ف الكبارية والناس كلها سمعتها والكلام طبعا وصل
نيجي للمحطة اللي بعد كده في حياة ست الكل الجدعة الاصيلة
نروح معاها سنة 56
وبعد مشاركتها في مهرجان * كان* السينمائي بفيلم شباب امراءة
قررت انها تعتزل الرقص
ومن الاحداث اللطيفة اللي حصلت في مهرجان
كان ان الست تحية حضرتك حفلة على هامش المهرجان
وكان بين الحضور نجمة هوليوود * سوزان هيوارد*
ودار بين الحضور حوار حوالين الازمة الفلسطينية
ولان سوزان مكنتش تعرف ان الست تحية بتتكلم انجليزي وفرنساوي بطلاقة
فغلطت النجمة الامريكية في العرب وسخرت منهم واعلنت تأييدها الكامل للكيان
فما كان من ست الكل تحية كاريوكا الا انها اندفعت ناحيتها بقوة وقلعت جزمتها وضربتها بيها على وشها مع وابل من الشتايم والسباب بالانجليزى❤????
وطبعا سوزان خدت ديلها في سنانها وجريت من القاعة
وسط ذهول الجميع من الحدث
وللاسف تم القاء القبض عليها مرة اخرى بسبب انضمامها لتنظيم حدوتة الشيوعي
اللي كانت بتهاجم فيه النظام من خلال مسرحية روبايكيا ومسرحية التعلب فات
واعتقلت من جديد في عهد السادات
ودا كان غريب جدا لانها ليها فضل كبير عليه بعد ماخبته في بيت اخوها لما كان هربان من الملاحقة الامنية على خلفية مقتل امين عثمان في نهاية الاربعنيات
ودي محتاجة بوست لوحده هبقى احكيلكم الحكاية كلها
والمحطة الاخيرة بتاعتنا معاها
كانت في عهد مبارك وكان دا في اواخر عمرها لما مبارك عمل حفلة لتكريم الفنانين
وكانت الست تحية قعيدة على كرسي متحرك
فرحلها مبارك لتحيتها وبمجرد ماشافته
كلمته بحده وقالتله ياريس في ناس بتنام جعانة
فلما حاول مبارك يشرح لها ازمة الزيادة السكانية واثارها السلبية علي المجتمع
قاطعته وقالتله انا مفهمش في كلامك التخين دا
متنيمش حد من غير عشى ياريس????
⛔الحقيقة انا اختصرت كتير من تاريخها الطويل في النضال
والوطنية وللحديث عن ست الكل بقية❤
⛔الحقيقة انا لايعنيني هي اتجوزت كام مرة
ولا هقف قدام مهنتها ولا هحاسبها نيابة عن ربنا
انا يعنيني اننا نحترم الجدعنة
والشجاعة والوطنية
ونحتقر النفاق والتطبيل والمداهنة والسكوت عن الحق
ومليون تحية للست تحية♥????