تحت الكنب شفت العجب

عالم كبير و بدون سبب

العاب معالق كوبايات

توكة و قلم على شماعات

حقيقي شفت اغرب حاجات

و دة كله فين ؟ تحت الكنب

براية ضايعة من سنين

و بقايا تفاحة و تين

و برص متحنط يا عيني

تحسه على نفسه حزين

و دة كله فين ؟ تحت الكنب

عنقود عنب أصبح زبيب

و حجاب لجلب دة الحبيب 

و ورقة بردي من التاريخ

و بقايا عمرك و النصيب 

و دة كله فين ؟ تحت الكنب

دور كدة يمكن تشوف

حلمي اللي ضاع بين الرفوف

دة كان معايا و بين اديا

يوم ما لخموني الضيوف

و دة كله فين ؟؟ تحت الكنب

اهين يا ضهري و الف اه

تحت الكنب غضروفي تاه

دة ثقب اسود جوة بيتي

شفطني مرمطني معاه

و دة كله فين ؟ تحت الكنب