عشان انتي اللي فهماني
هدوس على قلبك الطيب
بكل جمودي وجناني
وهجلد بالسياط روحك
وروحك دي اللي عشقاني
وواخداني لفوق ملكوت
لكن هتركها بتعاني
عشان انتي اللي فهماني
هسيبك ايوا
يمكن اموت
لكن هتعيشي في وجداني
يا شمس ونورت ليلي
وليل خيم على عمري
ف لحظة لما سبتيني
بسيبك
وانتي سايباني اسيبك ليه؟
ويهدا ثواني ويكمل
بناشد فيكي تفكيرك
وتقديرك ظروف غيرك
عشان انتي اللي فهماني
عشان انتي اللي فهماني
عشان انتي اللي فهماني
وقالها كتيرررر
وانا ساكته
شريط عمري بيتحرك
ثواني تمر
دقايق
عمر
لقيت الاستيعاب نقمة
وعقلي اللي كان واعي
وفاهم كل تفكيره
مقدر كل تدبيره
دا هو اللعنة صايباني
يارررريت
ياريتني كنت تلك البنت
اللي بتمثل
وتتمايع
وتتقصع
وتلبس جلد لون ساذج
عشان ألبد في احضانك
وأبان أضعف
فتتكتف وتيجي تحن
عشان مكسورة من غيرك
إزازة البعد فتتها
قوية وقوتي لعنة
وعقلي شيطان
بيدي لكل شيء معنى
وحتى وانت تارك روح
بتجلدها باسم الحق
بيفسر كل أفعالك
لأ وبيسألك مالك
تزود جلد في الميت
باسم الحق
وهو الحق من امتا
بيبات عندي
تركته وسبته من يدي
وسلمتك بيبان الكل
قلبي وعقلي وروحي
وحجتي ومنطق
بدون ما انطق
بقول حاضر
عشان انتي اللي فهماني
بتتكرر بنفس الرتم
ونفس الصوت على وداني
بيقولي كفاية توهتيه
ما بين فهمك وبين صبرك
على عيوب مهيش منك
ولا منه
بيتهمك؟!
بإنك حالة استحواذ
وعايزة الدنيا في حضنك
ما ترضي يا بت وتكُفي
أنانية وكمان ظالمة
غرستي جدورك الحالمة
في أرضه البور
هتطرح إيه
شجر وورود؟
هتطرح حزن يا هبلة
وهو كمان البعيد أبله
عشان حبك بعلو الصوت
لكن صوته بيغني فراق
بينعي الحب والأشواق
ويقتل بس بالراحة
وحجة قلبه مطمن
عشان ماشي
ومن امتا القلوب بتعيش شجر ناشف
مفيش أنصاف
يا أحبك فوق حدود الكون
يا هكره وابني بيتي ظنون
لكني معاك
عكست قانوني والمضمون
ودلوقتي وبكرة وبعد سنين
بحبك
ليلى يا مجنون
وقول تاني وقول عاشر وقول مليون
عشان انتي اللي فهماني
يا لعنة وساكنة وجداني
وراضية يا كوني وكياني
بصفقة موت