ليه روقة كانت زوجة في السر ؟  

و ليه سي السيد إتجوز أمينة متجوزش زبيدة ؟  

و ليه مكملش مع مراته الأولى اللي كانت بتتجوز كل يومين شاب جديد ؟  

ليه كل الناس بتشتم فيا و بتعشقني ؟ 😂

ليه مبحبش الجواز و مش شايفاه قرار حكيم لأي أنثى طبيعية في المجتمع ده ؟

و ليه فرصة بائعة الهوى في الجواز أسهل و أفضل من ست محترمة مليانة بالأنوثة ؟ 

————-

ببساطة لأنك أول ما تتجوز روقة هتحطها في قالب الست المحترمة اللي مبتعملش الغلط فهتتحول لأمينة 

و أول الغلط اللي ربتك عليه مامتك هو ان الشيشة غلط و الرقص رخص و قلة قيمة فمش هتحترمها الا لو بقت أمينة بردو  

و ان العيال مينفعش يشوفوكوا في أي وضع حميمي هتبوظوا أخلاقهم و هتبوظوا نظرتهم ليكوا و هيبطلوا يحترموكوا و هتفتحوا عيونهم … الخ الخ

فمن الأفضل لما أخلف أخلف من أمينة بردو  

و لو اتجوزت ست حلوة ( زي مرات سي السيد الاولى ) هتخاف يمكن حد يبصلها أو تروح منك في إتجاهات شمال من كتر الخنقة و عدم إشباعك ليها كست ( بسبب محاولتك لأنك تخليها أمينة ) فهيكون عينك في وسط راسك و طبعاً مش هتعرف تعمل تحكم على كل التفاصيل

يعني لو عرفت تتحكم فيها مش هتعرف تتحكم في نفسك ولا في الناس من حواليها 

لو عرفت تتحكم في خروجها مش هتعرف تتحكم في شكوكك 

لو عرفت تتحكم في لبسها مش هتعرف تتحكم في غيرتك 

و هكذا

فقدامك حاجة من اتنين 

١- يا تحولها لأمينة أم و راجل زيك شكلاً و موضوعاً و تمحي كل ميولها الأنثوية ( فتطمن لوجودها في البيت رغم النكد رغم التناحة و السماجة و الكلاحة اللي هتبقى فيها ) و ده هتفشل فيه فهتختار تتجوز أمينة م الأول  

٢- يا تتجوزها في السر ( زي روقة ) و تستمتع بيها كأنثى طبيعية في ظل مجتمع مِجرَّم كل ما هو أنثى ( ولا أستثنيك يعني زيك زيهم مجرم الأنوثة رغم احتياجك الشدييييييد ليها )   

و هنا بقول تتجوزها لأنك متأكد ان مفيش طريقة مختلفة للوصول ليها للأسف و لأنك عارف انك محتاجها و مش هتشبع منها كاحتياج راجل طبيعي لأنثى في حياته مش أم تانية ولا ست مدكرة 

و الأسهل هو انه يتفرج على بورن و يمارس جنس بره اطار الزواج فمحدش يمسك عليه معرفته ب " زبيدة " و يبقى الراجل اللي معرفش يتحكم في رغباته قصاد ست بيطبلها و هي ترقص … 

يلعب و يستظرف و يمارس العلاقات طياري و لكن يفضل محافظ على بيته و صورته الاجتماعية كراجل مخلف من ست مدكرة ميطلعش منها أي مظهر من مظاهر الأنوثة و حبذا لو كانت مختونة و على علاقة بست تانية " شمال " عشان يبقى معروف ان العيب منها مش منه 

البسترة اللي بتحصل للراجل بين ست مفيهاش أنوثة و أم العيال و أشبه ما يكون بأمه و بين واحدة شمال ماشي معاها يروق على حاله 

بيخلي النوعين دول سهل عليه تقبلهم ولا انه يتقبل " ست محترمة و شيك و في نفس الوقت أنثى حقيقية "

لأن الميكس ده بالنسباله مخيف جداً و عكس كل المألوف و اللي اتربى عليه بإن الستات نوعين ( محترمة و شمال ) 

المحترمة عاملة زي الشاويش و الشمال بنستخدمها للانبساط 

و ده اللي اتنقش في كل خلية من دماغه منذ الصغر 

و ان المحترمة مينفعش تكون شمال و ان الشمال مستحيل تبقى محترمة 

فلما بيقابل " ست محترمة و شيك و في نفس الوقت أنثى حقيقية لا هي شاويش ولا هي شمال"

بيتربن و بيحصله ERRoRrrrrrrr 

——————

ده كله بقى بيحطني انا و اللي زيي قصاد خيارات كلها أوحش من بعضها 

لأن لا أنا هتحول لأمينة 

ولا أحب حد يعاملني في السر لمجرد اني روقة 

ولا أنا هبيع الهوى و مش عشان محترمة و بس …. لأ 

عشان ده مش كواليتي بالنسبالي ال 

One night stands 

دي عاملة زي ال

Appetizers 

محدش يشبع منها و بتقل من قيمة الشئ ( زي ورق العنب لما يتقدملك ٥ منه تحس ان هيبته زالت كده و طعمه بقى يقرف )ده غير ان أحسن ما في العلاقات بييجي بعد ممارسة كتير 

بس يعني

فأنا متخيلة انت بتحبني ازاي و مقدرة انك راجل من القليلين اللي طلعوا بره الماتريكس و فهم أنوثة و بيحترمها و ده في حد ذاته شئ يستحق اني أرد عليك و أشكرك على ذوقك و أدبك في التعبير عن مشاعرك ♥️