" نفسي أعرف هو بيآخد منهم ايه عشان يكلمهم و يخونني "
= ميخصكيش حبيبتي، ميخصكيش تعرفي حاجة زي كده خالص
- إزاي يا آيه ميخصنيش أمال يخص مين ؟
= هو اللي يخصك انك عارفة انه بيعمل ده و مكملة، اسألي نفسك بقى انتي بتآخدي منه ايه فمكملة
ده اللي يخصك
انما طالما كملتي و عندك أسبابك اللي تخليكي متمشيش و تسيبيه رغم معرفتك التامة انه يعرف عليكي ستات تانيين، متعمليش نفسك بطل و عايزة تعرفي هو بيآخد منهم ايه
ببساطة لأنك في النقطة دي مش بس بتقلي من نفسك و كرامتك لأ ده انتي كمان بتخسري نفسك تماماً بإنك بتديها اشارات ان اللي بيعمله ده له علاقة بيكي أو بسببك و ان في حل عندك ممكن تقدميه عشان ميعملش ده و تدخلي في دايرة لانهائية من محاولات الإصلاح في إنسان و تلعبي دور المنقذ أو دور أمه …
لو عايزة تعرفي حاجة صحيح، إعرفي هو بيديهم إيه و خديه منه إنتي طالما عنده منه فايض …. انتي أولى بيه
- طيب مش يمكن لو عرفت هو بياخد ايه يكون عندي و اديهوله فعلاً و نخلص من القصة دي ؟
= لأ مش عندك و لو كان عندك مكانش دور عليه بره
- ممكن أكتسبه
= غلط حبيبتي غلط، انتي عمالة تختاريه و تخسري نفسك كل شوية
مجرد ان يكونلك هوية و شخصية ده اللي بيخلي الانسان اللي قدامك يحترمك و يخف عكعكة، انما لما يلاقيكي بتحاولي تسترضيه و تتشبهي بناس تانيين بتفقدي كل رصيدك في قلبه و بريقك في عينه و احترامه ليكي و بتكسري كل حدوده معاكي
فإتشغلي في نفسك حبيها و زكيها و اترفعي عن التفاصيل الوحشة في الانسان اللي قدامك متهمكيش و متخليهاش تهمك، اللي يلزمك بيعاملك ازاي دلوقتي و حالاً
و متقبليش بأقل من معاملة برنسيسات ! انما تلاقيكي راضية يعاملك معاملة صاحبه او ام العيال و بتسألي شايف فيهم ايه !!!
ما أكيد اللي شايفه كتير