انا اول مافتحت عنيا

فتحتها على جنة فى أسكندرية 

و عليك انت 

و جنبك شجرة مرشقة تفاح

فى كل يوم الصبح 

نفتح عيونا و نذكر الفتاح

و فى يوم صحيت من النوم

لقيتك قاطمها !!!

و الرب غضبان بشدة 

الموج بيهبد فى بيبان البيوت القديمة

و الريح بتأرأش ازاز الشبابيك

الرعد بيكهرب عمارات محطة الرمل

و الشتاء سيول بتاكل رخام أسفلت الشوارع

مش عارفة ليه ربنا سابك 

و ساب الشياطين تمسك فى خناقى :

_هى السبب 

هى اللى وزت قلبه الضعيف و خلته يقطم من الشجرة 

_ يا رب و غلاوتك هو اللى راح عمد مع سبق الترصد

انا كنت قاعدة فى حالى بخيط قميص نوم جديد البسهوله يمكن يبطل بصبصة 

هو اللى بيستعبط و ماحدش عارف يحاسبه

فضلت اصرخ و ابكى لربنا يمكن ....!!!

لكن ماوصلتش لأى نتيجة

لا الشيطاين ادتنى فرصة افسر

و لا الملايكة جت فى صفى 

و الحكم كان قاسى قوى عليا 

تطلع من جنة اسكندرية فى الحال

و تنزل جهنم روما فى ايطاليا 

و ادينا نزلت 

نزلت و شفت العجب يارب

و هو سبقنى و نزل ورايا 

و برضو بشوف منه العجب يارب 

يارب ارجوك نزلى سلم من السماء اطلع لك 

و لو مافيش سلم .....

نزلى حبل اتسلقه 

ابعت لى طير و انا اركبه 

ابنى لى حيط اتشعلقه 

ابعت لى عزرائيل يشلنى اليك و غلاوتك انا راصية 

أرجوك 

مش عايزة اقعد معاهم على الأرض يارب

مش عايزة ابقه زيهم 

خمسين سنة حرب مولعة بينى و بينهم

و غلاوتك رسولك انا تعبت 

و خايفة انك تزعل منى

لو جيت لك من غير اذن .