ياساده ...

إنها ليست حرب

إنها إباده

وأحنا زى خيال المآته

بنهوش ونخوف العصافير

لكن الصقور بيدوسونا بالبياده

أطفال وستات بتموت

بتتهد عليها البيوت

بالقنابل والمدافع والبارود

والحزن جوانا مكبوت

ومكتوب علينا السكوت

نصحى كل يوم على مجزرة

يستشهد ألوف

وألوف متصابة

محروقة ومتدمرة

أعدائنا بيسموها مفخرة

وعندنا مصيبة ومعيرة

مستحيل يكون عدونا

له إحساس زى البشر

مناظر الأطفال تبكى

حتى الشجر والحجر

من بشاعتها مش قادر أشوفها

بتقطع قلبى

وينزف منها البصر

عشت طول عمرى

أسأل نفسى

راحوا فين العرب

فين الفصاحة والشهامة

والرجولة

قالوا كل ده هرب

أهم شىء عنده مصلحته

وده بقى كل همه

وطبعه

والتطبيع نساه دينه

نساه أهله

ومش فاكر إلا

إنه يبنى مجده

ولو على حساب أبنه

وأبوه وأمه

المقاومة هى آخر خط دفاع

بتحمى شرف العروبة

فى غزة والقدس وجنين

فى كل الأراضى المنهوبة

العقيدة.....

عمرها ما كانت وجهات نظر

العقيدة.....

قول وفعل

سمع وطاعة لله

ولكلام سيد البشر

والأقصى من سنين يا مسلمين

فى أشد الخطر

انصروا إخوانكم بالدعاء

والمقاطعة

كفاية هروب

كفاية حذر .